ديوان الوردي

[الطائر المهاجر]

يا ما حلا السوزو الي عند عبدالله = ثمان وتسعين ابيض تقل غرنوق
بجلاجل ملبقه في بايكة فله = ماقد مسك طارته سواق مطفوق
غمارتين ليا غرز يبي يتله = قير دبل صممه مهندس بذوقي
صوت المكينة يالمشتاق تطرب له = بالخط الى من دعس ماهوب ملحوقي
بوراط انا وانت في ودايه نشهد له = بالطلعة اللي تشابه طلعة الطوقي
لا من بغيناه ياقف كود نشرله = حنا اسفل الظلع والسوزو وطلع فوقي
وراعيه الى جا مجال المرجله خله = عند ابن سلمان حق الضيف مطبوقي
بين الربع كلهم ما شفت انا مثله = غير انت يابن سعيد بحسن منطوقي
شباب فاهم يحسب حساب للزله = بدرب الصخا اثنينكم ماهوب مسبوقي
الشعر يا ربعنا ننظمه في حله = مع النشاما لزوم نوفي حقوقي


العود نازل جوار مطير = في مجلسه فاتح بابه
رجل كريم ويحب الخير = يا سعد منهو تعزوا به
لا من نوى القنص حط الطير = بالجيب ودربيل بجرابه
مع نقة عينوه امير = يأمر على الربع وأحبابه
مع الفجر لا تعدى تمير = العصر نجران صلى به
يبي عروق ورى الخرخير = ما هوب طلح بحطابه
بالعرق تسمع صرير السير = غيره حشا ما تهقوا به
عشق دبل يسند به القير = والعرق الأوسط تعشى به
ولا من رجع سالم لسدير = قسم الربع يمهم جابه
في عبلة نحتريه عصير = والوردي رحب وهلا به


راية العز والتوحيد مرتفعه =من ميه عام تمت شهر شولي
الحكم ما حصل يا كود من وقعه=وقعه من حضرها خاف واهتالي
ابو تركي دخلها قايد ربعه=وارد للخطر مع نقوة رجالي
حاكم بالعدل والدين متبعه=عله بجنه الفردوس نزالي
خلف لنا ملوك طبعهم طبعه=ما حد بالسياسة غير ومالي
الفهد حاكم نال الوطن نفعه=يخدمه خدمة في مستوى عالي
فاز بالطيب ويا العز والرفعه=للامور الصعيبة جوم حلالي
القبايل جميع اليوم مجتمعه=الجهل والتعصب بينها زالي
بالعقيدة وحكم الشرع مرتدعه=اختلف طبعها من حال الى حالي
المواطن تعلم حسنوا وضعه=جامعات تشمل بني وعيالي
كل عام تخرج للوطن دفعه=يخدمون الوطن في كل الاحوالي
مملكتنا لها بين الدول سمعه=التطور بها يضرب به امثالي
للزراعة والصناعات مندفعه=ما لبحر ياصل لنا نشربه حالي
تمت وصلوا على المختص بالشفعه=تعداد ما حدر شعيب بمسيالي


سلام مني عدد ما همل همالي = للشاعر اللي على الساحة تعرفونه
عبدالله اللي عزيز وعندنا غالي = يم القراين لزوم له تودونه
حيث ابن عمار نادر ماله امثالي = ضيفان ويا الربع لا جوه يلقونه
لجل المراجل كريم ويرخص المالي = الخرفان ويا الحشو تلقاه بصحونه
حر تعلى نزله منزل عالي = ممشاه صعب بهذا الوقت يمشونه
يحرسه من كل شر ربنا الوالي = يقولها واحد من اللي يودونه
هذي مشاعر مودة جت على بالي = من كل شك وريبة حيل مصيونه


يالله المعبود علام السريره = عالم اسرار الخبيث المخبثي
تهدي الاشرار عامين البصيره = قبل سيف العدل يسنن ويعثي
العبث بالامن ذي حالة خطيره = وشله الارهاب تقطع وتخسي
شرهم عم البشر في كل ديره = زمرة تمشى بدبرة فسفسي
غاسل مخه على كيفه يديره = بايع روحه كبيل مقيدي
مستغل عقول ورعان صغيره = عاطلين وفاشلين وحقدي
عله بنار توهج بالسعيره = اعدم اجواد تهجد سجدي
حاقد على الوطن ما فيه غيره = بدبرة الشيطان يركض ويعدي
والدينه عينوا منه الضريره = هرجهم يافلان ما شفت ولدي
مالقوا منه صله ولا بريره = مالقوا غير الهموم تنكدي
من عقب ما أبوه يرسم له مسيره = صار صيده للخباث القردي
كيف مسلم يعدمه رمي بذخيره = ماشي بفتوى خشاش هلسي
لاخرج عن ملته يحكم ضميره = لسمعة الاسلام يشوه ودنسي
ما اكتفى بالغرب شمل شبه الجزيرة = ما علافنا غايته واللي يبي
جاهل وفتح له ابواب كثيره = شف سلاح الغرب فينا يجربي
مثله وشرواه معروف مصيره = ولا درينا عنه يقطع ويهبي
الوطن يأهل الوطن مافيه غيره = نانقطع روس كل مخربي
لا عصا علاج العضو ويا الجبيره = كل عضوا فاسد له ما نبي
نرفع الرايه مع سيوف شطيره = راية التوحيد وضحها النبي
مع ملكنا عل مولانا يجيره = خادم البيتين وربي يشهدي
ذخرنا حلالها لو هي عسيره = لا اظلمت نمشي على نور الجدي
مع ولي عهد حكيم يستشيره = درعنا بالجيش ضد المعتدي
ونايف اللي نعرفه مافيه غيره = عينه اللي ساهرة ماترقدي
تمت بذكر الله اللي نستخيره = الواحد اللي عن عبيده مغتني


يا لله يا معبـود يـا الفـرد الصمـد =تجيب دعوة داعـي لآمـن دعـاك
عبـد يعبـدك للشهـادة مـا جحـد =مدي حقوقك كلهـا يرجـى رضـاك
إلي سكن ها لمملكـه شيـب وولـد= يا ربنا إلـي كلنـا تحـت رجـاك
تديـم هـذا العـز بقـيـادة فـهـد =والي نوانا بشـر تعطيـه الهـلاك
في عهـده الميمـون ماشفنـا النكـد =ما بقى إلا الغيث ينزل مـن سمـاك
مليكنـا المحبـوب طـور هـا لبلـد =ومما عطاه الله بـلا منـه عطـاك
حكم الشر يعه مطبقـه حتـى ركـد= والنور شفته عقب ما انته في عماك
تشـوف بعيونـك مشاريـع جــدد =حتى البحر حـلاه لـك ثـم سقـاك
يا علنا نسلـم مـن عيـون الحسـد =كم أجنبـي منوتـه ساكنها معـاك
نبـي نجـدد لـه ولانـا والعـهـد =محظوظ يالي مثل أبو فيصـل ورآك
يكفي فخر انـه ولـد طيـر السعـد= عبد العزيز إلي بعـد ربـي حمـاك
ورآه عبـد الله عضيـد لـه سـنـد =لاجيت له في مكتبه بأمـر شفنـاك
بالليـل يسهرماهتنـى بنومـه رقـد= يدرس مواضيع لها سياسـه تحـاك
فيه الورع والدين واضح مـع زهـد =وريس حرس خصمه يبي منه الفكاك
سلطان يلي عندك اخـلاص وجلـد= يلقى الفرج عقب الولى منهو نصاك
عدونـا مـن هيبـتـك ذل وهـجـد =يلقاك ابو فيصل الـى منـه نخـاك
ونايف لـه فضـول كثيـرات العـدد =قيد يدين اللي يتسبـب فـي شقـاك
ضيف على الحاقـد ليـا منـه بـرد =لـولاه بعـد الله بسلاحـه رمـاك
البيت ما شالـه ياكـود اربـع عمـد =وانته بوسط البيت عايش في رخاك
وختامها عـداد مـن صلـى وسجـد =صلو على منهو على دينـك هـداك
محمـد اللي باشفـاعـه انـفـرد =في يوم باعمالك تبي تاخـذ جـزاك
اماتعيـش بجـنـة فيـهـا رغــد =وتنزل مع الاخيـار وهـذا منتهـاك
هذي بيـوت قالهـا الشاعـر حمـد =ابن مغامس فرصتـه يومـه لقـاك
من اجـل حكامـه نظمهـا واجتهـد =لوما وفى في حقوقهم ما شي حقاك

هذي القصيده قالها الشاعر عندما سافر ابنه النقيب/عبدالرحمن الى الولايات المتحده الامريكيه بدوره


ابـدا بذكراللـي خلقنـا ولنـا رب=رب صلاة العبد لـه مـع صيامـه
للمعرفه والعلم كـل ضـرب درب=يبي يحقـق رغبتـه مـع مرامـه
يابو حمد اوصيك في ديرة الغـرب=حتـى تعـود للوطـن بالسلامـه
لوكنت ضابـط فاهـم قـد تـدرب=اعرف ترى مثلك عليـه الملامـه
الرجل الى من راح بعيـد وتغـرب=مارفـق الا طيـب بـه شهـامـه
المنحرف حذرى تجي لـه تقـرب=جنب طريقه واتركه مـع خمامـه
يقولـه اللـى راح قبلـك وجـرب=واللي مجرب لزوم تسمـع كلامـه
احرص على الدوره حذرى تهـرب=خلـك بهـا متمـيـز بالعـلامـه
بالي معك مشغول بالحيل يالـذرب=ابوك يهوجس بك ترى في منامـه
مدة غيابـك يالسنافـي المعـرب=نسلى بها بيـن الربـع بالخطامـه
احرص على لينا وحذرا من الضرب=عطها مطالبهـا ومعهـا ابتسامـه
وحمد سمي جده له القلب يطـرب=حبه بوسط الجوف بانـي خيامـه
تمت بذكر اللي لنا يفـرج الكـرب=رب خلق عبـده وكـون عظامـه