ديوان الوردي

[الطائر المهاجر]

هبت هبوب الجنوب وجابت الكادي = والكادي اللي نشمه من جبل فيفا
من قبل ازور الجبل والوضع لي عادي = جوالحين قلبي تولع في هوى هيفا
غروٍ عسى الله يفكه عين حسادي = مثل الظبي مختفي بحماه ما شيفا
جيته وقلت اسالك بالله انا غادي = وصف لي الدرب ياحلو التواصيفا
جذب شعوري زيادة صوته الهادي = وانا تماديت معها باسواليفا
ياليت منهو جلس مع بنت الاجوادي = تحت الصنوبر على روس المشاريفا
ويقول انا اليوم ممسايه مع رقادي = ضيف عليكم ولا عنده مصاريفا
ثم اطلب القرب من مركوز الانهادي = وكانه حصل ما حسبنا للتكاليفا


المملكة تستقبل اليوم دفعات = من جا يزور البيت ماحد يرده
بامرك يا ابو فيصل جميع الوزارات = حجاج بيت الله لها مستعده
حطو لجان عاملة كل الاوقات = متحملين الجو حره وبرده
شرق وشمال معسكر واستراحات = من دون مكه والمدينه وجده
حالة تاهب بالبحر والمطارات = واللي على حدود الوطن زاد جهده
وسعت بيت الله وحطيت ساحات = وانفاق ضخمه للحرم مستجده
ومراكز للطب تصرف علاجات = مع موتر جاهز للاسعاف نجده
وكشافه وجنود عند الممرات = واللي يبي مرشد يلاقيه عنده
وخيام ضخمه شامله كل ميزات = تتحمل النيران والحرق ضده
والما يوزع بارد من ميزات = في كل موقع من بغا الشرب ورده
حتى الطرق سيدين بعدة مسارات = وباصات ضخمه بالمواقف تكده
الله يمد بعمر جزل العطيات = من يخدم البيتين كل يوده
ويحفظ ولي العهد ساس المروات = والنايب الثاني بفضله يمده
ونايف سديد الراي رجل المهمات = اللي يتابع كل نقص ويسده
كل الدول تشكر وترسل شهادات = مجهود يبذل زايد فوق حده
هذي حقيقه ما دخلها محابات = من شاف بعيونه بها باح سده
يالله يالمعبود رب البريات = عن مملكتنا كل شر تلده
ومن حج بيتك تغفر له خطيات = وتحميه من نفس تغار وتحسده
وختامها صلوا على كل حزات = على نبي الله رسوله وعبده

هذه القصيده بمناسبة احتفال اهالي جلاجل بعيد الفطر المبارك


سلام مني لاهل الطيب والكار = اللي حضرنا حفلهم ثالث العيد
نبي نشارك مع طويلين الاعمار = نجي لهم او فيه سابق مواعيد
لا من دعونا ما نعتذر بالاعذار = لاهل الصخا والجود من غير تحديد
ربعي ها جلاجل حلاحيل واخيار = شهادة مني ولاأنقص ولا ازيد
اللي مجالسهم بها دلال ووجار = مدهال للضيقان لا جو من بعيد
من جالهم يلقى معزة ومقدار = اللابه اللي بالملاقا صناديد
يلقى الدلال الصفر تركى على النار = ووجار فيه الجمر مثل الجلاميد
امقلطين الحيل بصحون كبار = وإلا من الحشوان نقوة مفاريد
سلم لهم ماشي على صغار وكبار = من عهد الاول عهد حاتم وابا زيد
وخصيمهم من فعلهم دوم محتار = ما عندهم غير اشهب اللال والقيد
شجعان الى جا يوم به صار ما صار = لا ولعة من فعل ناس مقاريد
رجالهم عاقل حليم وصبار = ما عندهم بالهرج زود وترديد
اديارهم ياعلها مزن الامطار = والما يحير بها وتصبح كواريد
والغرس الى وقع به الطير ما طار = في ظلها يلعب بزين التغاريد
تمت بذكر اللي خلق جنة ونار = تعداد ما تثمر غروس الكواديد


لامن عزمنا على المقناص = خذنا المعاميل والدله
ونيسان وفكسار مهعن شاص = وعيال ستة من الشله
واربع طيور وطير خاص = للوردي يتبعه مخصص له
نمشي بيمه ماهوب خراص = شرق الرمياه نوجه له
في خبه نمسك المفراص = والظبي نمسكه ونتله
وطير الهدد مخلبه لا غاص = بالصيد قمنا نهرول له
والزين وربعه بوسط الباص = خلف المعزب ويتبع به
سواقهن ماهر وقصاص = عشر ولا يعرف الزله
ادلال صفر وتمر خلاص = مع جادل ما يجي مثله
يدعج غنج يلعب ورقاص = بالشعر الاشقر ليا فله
والنهد ما مصه المصاص = وقف بحجمه على حله
يجذبك له مثل جذب الماص = بالهرج ودك تسمع له
لقلب المشقا تقل رصاص = يركد معه ويتجاوب له
ونرجع بحمل على القلاص = هديه له تقدم له


الى منا طلعنا الطعس شب النارلي ياسيف = نبي دله على الكيفي وكيفك يابن قحطاني
بجو معتدل زل الشتى واقبل علينا الصيف = وفنجال اشقر تضبطه لي ياطير حوراني
تحت نورالقمرنسمر مع اللي يكرمون الضيف = رجال تازن الهرجة بلا زود ونقصاني
ابو تركي وابو خالد وخاله سالم ابن هيف = وابو عبدالعزيز ابن عقيلي ذرب الايماني
وابومحسن خفيف الدم عايض مايبي تعريف = يشيل القاف ويلحنه باشكال والواني


يالله يالمعبود يالفرد الصمد = تجيب دعوات داعي لامن دعاك
عبد يعبدك للشهادة ما جحد = مدي حقوقك كلها يرجي رضاك
اللي سكن هالمملكة شيب وولد = ياربنا ياللي كلنا تحت رجاك
تديم هذا العز بقيادة فهد = واللي نوانا بشر تعطيه الهلاك
في عهده الميمون ما شفنا النكد = ما باقي الا الغيث ينزل من سماك
مليكنا المحبوب طور هالبلد = ومما عطاه الله بلا منه عطاك
حكم الشريعة طبقه حتى ركد = والنور شفته عقب مانته في عماك
تشوف بعيونك مشاريع جدد = حتى البحر حلاه ثم سقاك
يا علنا نسلك من عيون الحسد = كم اجنبي منوته ساكن معاك
نبي نجدد له ولانا والعهد = محظوظ ياللي مثل ابو فيصل وراك
يكفي فخر انه ولد طير السعد = عبدالعزيز اللي بعد ربي حماك
وراه عبدالله عضيد له سند = لا جيت له في مكتبه بأمر شفاك
بالليل يسعر ناهتنا بنومه رقد = يدرس مواضيع لها سياسة تحاك
غيه الورع والدين واضح مع زهد = وريس حرس خصمه يبي منه الفكاك
سلطان يلي عندك اخلاص وجلد = يلقى الفرج عقب الولى من هو نصاك
عدونا من هيبتك ذل وهجد = يلقاك ابو فيصل الى منه نخاك
ونايف له فضول كثيرات العدد = قيد يد اللي يتسبب في شقاك
ضيق على الحاقد الى منه برد = لولاه بعد الله بسلاحه رماك
البيت ما شاله ياكود اربع عمد = وانته بوسط البيت عايش في رخاك
وختامها اعداد من صلى وسجد = صلوا على منهو على دينك هداك
المصطفى اللي بالشفاعة منفرد = في يوم باعمالك تبي تاخذ جزاك
اما تعيش بجنة فيها رغد = وتنزل مع الاخيار زهذا منتهاك
هذي بيوت قالها الشاعر حمد = ابن مغامس فرصته يومه لقاك
من اجل حكامه نظمها واجتهد = لو ما وفى في حقهم ما شي خفاك


يالله يالمعبود يا عالي الشان = تحفظ لنا حكامنا المخلصيني
يا أمير ينتظر ضعوف ويتمان = في ظلكم عقب الوي محتميني
ياسيدي شعبك شيوخ وشبان = في غيبتك بالحيل متأثريني
يا مرحبا ويامسهلا بذري الايمان = فال السعد والعز للمسلميني
عيد الفطر خلص بدا عيد سلمان = عم الوطن كله يسار ويميني
نبي نقول الشعر ونجر الالحان = لحن على المطلوب وربي يعيني
من لام رجلك يا اصبح الوجه غلطان = تسهر وغيرك بالغرف نايميني
رجل تدوس القاع في كل الأوطان = اعصابها ياشيخ لازم تليني
من يرتكي للحمل لا شك تعبان = لابد من عاه بجسمه تبيني
في عهد ابو فيصل ترى فعلكم بان = فعل عظيم وشعبكم شاهديني
بأمرك تعالج كم مريض ووجعان = رجع سليم عقب جر الونيني
يوم العدو جيشه دخل قصر دسمان = واهل الكويت بعزوتك معتزيني
ثار الفشق والجو مليان دخان = صوت المدافع يرعب السامعيني
جيش تقوده يارد الموت شفقان = لمحة بصر وعداه له راضخيني
وختامها صلوا على نسل عدنان = سيد البشر هو خاتم المرسليني


قالوا تحرك يا حمد واجمع فلوس = بيتك ليا جينا مفتوح بابه
نلقى جيوب موقفة حولها جموس = وفي مجلسك نلقى جميع القرابه
قلت الدخل معروف والصرف مقيوس = كل على قده يفصل ثيابه
وجدي على روض لياهب نسنوس = اشم ريحه والغدا والعشاء به
واللي يحد الروض صيهد به طعوس = حدره غدير نازل من سحابه
والى رفعنا الشوف نلمح لنا سقوس = في وسط ذود منظره له مهابه
يرعاه رجل بالضحى يعطي دروس = لا جاه ضيف قال يا مرحبا به
والى نصينا الضلع نلقى به ونوس = نلقى الحبارى والمها وسط غابه
ماهوب مدهول ولكن مانوس = كله خضار ولا نعاين ترابه
زاهد ولا بالبال هم وهاجوس = ولانيب طلاب ولا راعي طلابه
واعمل ليوم تبي تشيب الروس = كل يبي يجزا على ما سعا به
علي افوز بحور جنتات فردوس = وانزل مع الاخيار هم والصحابه
تمت وصلوا عد ما يثمر غروس = على النبي اللي مفسر كتابه


لسدير اروح دايم فيه موجود = واللي عنا يم الخطامة لقاني
بين الجماعة ماكر الطيب والجود = والطيب فيهم من قديم الزماني
فيهم كرم للضيف ماهوب محدود = يلقى الصحون بها هراف سماني
والمبخرة فيها الجمر وازرق العود = نعرف حقوق الضيف لا صار عاني
باب القصر مفتوح ماهوب مردود = من فعل ربعي قلت زين المعاني
عندي على قولي مواثيق وشهود = فعل النشامى للقصايد حداني
ما بينهم غيرة وحاسد ومحسود = الكل جنب عن طريق الطماني
والدين فيهم وارثينه من جدود = منهم تعلمنا وخذنا امتحاني
يرجون فضل اللي كريم ومعبود = رب رحيم ونشكره بامتناني
نقوة رجال جنبوا كل منقود = من لا يحسب حساب للعيب باني
والهرج ما زون ولا عندهم زود = رجالهم عاقل وسيع البطاني
تتحمل الزلات لكن بحدود = بعض الامور الها يجي علم ثاني
يوم السلاح اول مقمع وبارود = خصيمهم عشرة تعود ثماني
شعيبهم بالغصب ما هوب مارود = دونه رجال سيفهم صيرماني
تمت بذكر اللي خلق كل مولود = رب يغفر الذنب للمودماني
رب يحشر الخلق في يوم ماعود = يوم الجزى للسيئة والحساني

هذي القصيده قالها الشاعر عندما غرق ابن عمه في البحر وانقذه الله من الموت المحقق


هاج البحر والموج يضرب على الجال = غطى على السباح طول ارتفاعه
وهق ولد عمي وله سلم الحال = واومت به الامواج في وسط قاعه
صوت علي ابراهيم حمال الاثقال = طير السعد يعجبك قو اندفاعه
انا اشهد انك يا حمد جبت رجال = يارد حياض الموت كله شجاعه
حمي الوطيس وبينت كل الافعال = وارخص حياته مثل ذيب المجاعه
جاه المدد والعون من سيد الابطال = ولد عمي احمد قبل ربع ساعة
خطو الولد يشفيك فعله الى صال = مثل الاسد لا جاك رافع ذراعه
حيث الغريق اللي غرق ماله امثال = و راح كان انهد ركن الجماعه
له مجلس مفتوح للضيف مدهال = وفيه الظفر والطيب ويا اللكاعه
مير البحر معروف يخدع ويحتال = به قوة تقلب بواخر بضاعه
الوذ بك يارب يا علام الاجال = من صيحة الغفلات والانفجاعه
تمت وصلوا عد ما وادي سال = على النبي المنفرد بالشفاعه