ديوان الوردي

[الطائر المهاجر]

يا عل روض خريم تسقيه الامطار = طير السعد نازله باختياره
اميرنا المحبوب قيدوم الاخيار = جده ابو تركي موحد دياره
نسل الملوك طويلين الاشبار = ماجد عطاه الله لطف ومهاره
وابوه عبدالله لنا دره وستار = من غرته نفسه كرب له عياره
حر ولد حر كريم وصبار = صاحب سمو ما تغير مساره
يمناه لاجل الخير مداتها كثار = كريم سبلا زايد عنه شاره
يحميه رب البيت من كل الاقدار = فضله شمل في كل حي وحاره
ما هي كثيرة منه يا نسل الاحرار = مثله وجنسه للوطن هم عمارة
كم واحد يشكي له الحال محتار = باذن الولي علاجه يصدر قراره
حتى المريض يزيل همه والاكدار = ونفسيته ترتاح عقب انهياره
نبي نقول الحق لو كان اسرار = ننصف بها اللي ما يحسب خساره
اللي له افعال تجي عنه الاخبار = مثل المطر لا طاح بين خضاره
تشهد له المملكة من اللي بها صار = من سبته لبست ثياب الحضاره
اللي سكن فيها من كبار وصغار = ومشروع جبار موقه قراره
هذي مشاعر قلتها سر وجهار = لاميرنا المحبوب ساس الاماره
تمت بذكر اللي قهر كل الاشرار = تعداد من صلى ببيته وزاره


كثر الحكي والهرج لاشك ننفاه = لا صار في بعض الرجال المناعير
لا جاك نمام فحذرى تلقاه = مكروه عند الناس من يومه صغير
متشبع بالخبث ساسه ومجناه = يشذب عروض الناس شذب المناشير
هماز نماز خبيث بممشاه = كم واحد من رفقته ما لقى خير
من هرجته درب المشاكل عرفناه = ينقل كلام فيه كذب وتزوير
لو نعرف اهادفه حشى ما سمعناه = يعطيك علم وينقل العلم للغير
يرتاح الى جت له على ما تمناه = خبيث طبع يدور الشر تدوير
المجلس اللي فيه لجله تركناه = نمشي ولو طالت علينا المشاوير
نمشي لرجل حاش طيبه بيمناه = رجل كريم ولا يحسب المخاسير
القصر ظله حدده رفع مبناه = والقصد واضح ما يبيله تفاسير
نسمع تراحيبه بنا لا وصلناه = في مجلس مفتوح لجل المسايير
رجل الى منا نخيناه نلقاه = نلقاه في وقت الليالي المعاسير
نرتاح الى منا حضرنا وشفناه = حق الضيافة قام به دون تقصير
جنسه ليا منا فقدناه زرناه = له عندنا جاه ومعزة وتقدير
وان زاد حملع عنه حنا نقلناه = نقضي لزوم اهل الوجيه المسافير
مانهرج بشي طلبه وعطيناه = العلم ما يطلع ومحفوض في بير
رايه سديد لا بغينا استشرناه = له هيبة مع منطق وتعبير
تمت وصلوا عد برق لمحناه = على نبي جالنا بالتباشير


الف اولف شعر وانظم لي ابيات = يا كود بعض الناس يسمع وياعي
والبا بلاي اليوم انا شفت حاجات = هي السبب في ضيقتي والتياعي
والتا ترى اللي ما يجي منه زلات = محبوب عند الناس وامره يطاعي
والثا ثلاث اشيا ماهيب صعبات = خلك وفي ومخلص واجتماعي
والخا خويك لو يجي منه خملات = هرج القفا بالسب مافيه داعي
والجيم جاهد نفسك بكل الاوقات = كم واحد طاوع لها ثم ضاعي
والحا حلالك لا يجي به مرابات = خله نزيه من الدلس والخداعي
والدال دبر من طلب منك فزعات = من جاك عاني يلزمك له تراعي
والذال ذاكر كان تبغي شهادات = متسلح بلعلم فاهم وواعي
والرا راعي السو ينشبك ساعات = درب الردى يجذبك له باندفاعي
والزا زمان فات كله مروات = يوم العرب في قل دايم جياعي
والسين سرك تحفظه دوم بسكات = لا تكشفه للناس يظهر يشاعي
والشين شف لك وقت خله زيارات = من صد عن ربعه يصير انقطاعي
والصاد صدك عن هلك بين شلات = مثل الحلال الي ترك للسباعي
والطا طريق تعرفه به مسافات = امسكه لو به نزلة وارتفاعي
والظا ظلام الليل ساس المتاهات = لو كنت صاحي راس جاك انصداعي
والعين عش مرتاح وانس الذي فات = خلك غني النفس فيك اقتناعي
والغين غير مجلس فيه خمات = اجلس مع الطيب طويل الذراعي
والفا فرج ربي يزيل الكرابات = والرجل يصبر لايصير انجزاعي
والقاف قم صل الوتر عشر ركعات = واللي رقد ما قام وقته ضياعي
والكاف كف وخل عندك علاقات = بين الربع محبوب بالخير ساعي
واللام لاكبر الرجل والعمر فات = يصبح كما طفل بسن الرضاعي
والميم مال الرجل نقص الى مات = النقد يقسم والعماير تباعي
والنون نفسك غذها بالقراءات = بالكتب لك رغبة ومعك اطلاعي
والها هداك الله على كل طاعت = قبل العمر يفنى يحين الوداعي
والواو وص بثلث مالك بمبرات = مشروع خيري دايم ما يباعي
واليا ياعل الله يغفر الخطيات = يالله عسى ربي لعبده يراعي
تمت وصلوا عد وبل المخيلات = على النبي الهاشمي خير داعي

هذه الابيات تحث على طاعة الله اولاً ثم السعي الى طلب الرزق وعدم اليأس من رحمة الله


الرزق عند الله يبي فعل الاسباب = ورزقك يجي يمك بيوم وليله
ماكل من يبغى الدراهم لها جاب = لو كان راعي راي وبخص وحيله
كم واحد يرمي للاهداف ما صاب = ماهوب صايب دام الحظ ميله
يفتح مشاريع ويخسر ولا تاب = لا فشل مشروع بدا في بديله
من يعتدل حظه للاموال كساب = ويعرف طريق البنك يودع حصيله
ومن طاع ربه ينفتح له مية باب = واللي كتب له رزق لازم يجيله
الرابح اللي زهد وعنده كتاب = يحفظ كلام الله ودايم يشيله
دامه شباب باول العمر ما شاب = ماقل شوفه وطاح منهد حيله
بالخير يذكر عند ربعه والاجناب = وان جا لزوم للربع يرتكي له
ما ينقل الهرجه ولاهوب سباب = ماهوب ناقص راي هرجه فشيله
ربعه يودونه شباب وشياب = ونفسه بها خفه ولاهي ثقيله
ولا يسمع اللي للمخاليق يغتاب = دايم بحاله ما يجي منه عيله
مثل العمود اللي مثبت بالاطناب = يثبت ولو جاه الهوى ما يزيله
لجل الكرم يصرف ولا يحسب حساب = جزل ولد جزل ونفسه جزيله
لا سمع صوت الضيف هلا بترحاب = يمد له فنجال مازون هيله
يقدم الميسور ماهوب نصاب = مثل الذي يكرم ليا جا عميله
ماهوب دعبول تقل بعض الاذناب = يضحك بسنه والدواخل عليله
مابه ثقه متقلب ماله اصحاب = ما يعرف الا حرمته مع عديله
حذرى تجالس واحد منه ترتاب = اجلس مع الطيب وخل الحثيله
تمت بذكر لله عدد غافل تاب = رب كريم كلنا نلتجيله


ياهل العوجى نبي صوت رفيع = من بيوت قالها الشاعر حمد
كلنا معكم نبي نشارك جميع = رافعين الصوت شيبان وولد
طاعة الله ثم ابو متعب نطيع = خادم البيتين من عقب الفهد
من مشا وياه ما والله يضيع = نعلن البيعه ونعطيه العهد
حاكم متمكن باله وسيه = ربي اللي واهبه صبر وجلد
مثل عبدالله لنا حصن منيع = نسل ابو تركي مؤسس هالبلد
كل غيث بأمر ربي له ربيع = كل مسلم يشكر الله ما جحد
وابوخالد يعرفه حتى الرضيع = مدته صعبه علينا بالعدد
كم مريض راجعه وهو وجيع = كف عنه الله همومه والنكد
نجمنا اللي ساطع يلمع لميع = هو ولي العهد لعبدالله سند
تمت وصلوا على منهو شفيع = عد من صلى لمولاه وسجد

في ليلة الاثنين الموافق 9/6/1417هـ انتقلت والدة الشاعر/حمد بن عبدالرحمن المغامس الى رحمة الله تعالى
فجاءت قريحة الشاعر بهذه الأبيات المتواضعة في رثاء والدته رحمها الله



علم لفاني هزني ليل الاثنين = من سبه عيت عيوني تنامي
هلت دموع العين والناس ممسين = كني صغير السن وقت الفطامي
اول نجي للدار بالحيل ولهين = الوالدة تاخذ وتعطي كلامي
واليوم صار الدار كله معزين = على عزيز راح عالي مقامي
عقب الظهر بالقبر والناس لاهين = أون اما ونة كسير العظامي
قلبي مع امي والعمر فوق خمسين = ومن فارق امه ياعرب مايلامي
لاشك اهل الدار ياخوي غالين = هي بينهم نور يزيل الظلامي
البارحة بالحلم عندي تصلين = صلاة وتر كاملة بالتمامي
ما قدر المعبود نقبله راضين = والموت حق ما خمى عنه حامي
جعل القبر يصبح رياض وبساتين = يفوح به ريح النفل ولالخزامي
وبجنة الفردوس علك تفوزين = والحور من حولك ترد السلامي
ادعي ويدعي لك ضعوف مساكين = صاروا عقب فرقاك دون اهتمامي
صلوا على خير الرسل والنبيين = صلاة رب البيت مسك الختامي


مرحوم ياللي رحل عنا وخلانا = خلا القيادة لعبدالله وسلطاني
يالله يالرب البريه تقبل دعانا = ترحم ملكنا فهد يا رب الاكواني
حنا عياله على ملتك ربانا = دستوره الشرع داحل كل شيطاني
الموت حق ولكن موته ابكانا = عشرين مليون صغار السن وشيباني
نذرف دموع الحزن تقول يتمانا = من حبنا له تهل دموع الاعياني
ما عاد نلقاه يامرنا وينهانا = الحزن عقبه على وجيه البشر باني
يبكيه يتمان ورمل وكل وجعانا = ويبكيه منهو عليه ديون غرقاني
حتى البحر شال ملحه منه واسقانا = وراع الدخل رغم قله للسكن باني
على التسامح وحسن الخلق مشانا = قبايل كلنا جيران واخواني
وعلى الامن والعقيدة حيل وصانا = يجزاه بالخير عنا عالي الشاني
وصحاري عمرت مدن بسكانا = مع خدمة لاجلها باشكال والواني
كل حي به مركز صحي لمرضانا = مع مدرسة للبني واخرى لولداني
حتى الزراعة بعهده جالها شانا = للمملكة سمعة في كل الاوطاني
ياعل قبره خضار مد الاعيانا = يشم به ريحة الكادي وريحاني
جنات عدن ثمرها بين الاغصانا = بأنهارها اللي شجرها منه روياني
وبجنة الخلد الى جينا يلقانا = من عقب يوم جميع الخلق به فاني
يا ربنا اللي نعبدك انت رجوانا = تجزي ملكنا فهد عنا بالاحساني
وتغفر لنا كلنا وجميع موتانا = يالواحد اللي نعدك ما معك ثاني
وصلو عد ماتهل السحب بأمزانا = وعداد شقر الرمل في طعس حمراني
على النبي القريشي نسل عدنانا = نبينا محمد اللي هدانا لدين رحماني


بقدوم شهر الصوم مستبشريني = نستقبله فرحين في كل الاوقات
شهر فضيل وعل ربي يعيني = هذا الشهر مافيه روحه وجيات
يالله عسانا به من العانميني = يغفر لنا المولى جميع الخطيات
نبي نعبد الله وله خاشعيني = نطلبه يسمح عننا كل سيات
نصيحة لله يالسامعيني = لا تشغلون الوقت في غير طاعات
ما كل عام له ترى مدركيني = كم واحد نفقده قالوا لنا مات
لابد يا مخلوق لك دافنيني = بالقبر ما ينفعك مال او وجاهات
احرص على الطاعة مع المسلميني = واكثر من القرأن واحفظ لك ابيات
واخرج زكاتك واعطها المعسريني = فرض فرضه الله رب البريات
اشوف بعض الناس متهاونيني = تترك صلاة واجبة وقتها فات
شباب ياللي بعضكم غافليني = حذرى السهر بالليل وسط استراحات
من الفجر حتى العصر نايميني = مثل الجنايز بالشراشف مغطات
بامر العقيدة كلكم فاهميني = متعلمين وحاملينٍ شهادات
اقولها وانا من الناصحيني = نصيحة دونتها شعر وابيات
وختامها يا علنا فايزيني = واعمالنا من كل سيه منقات


عل السحاب اللي تبين سواده = تظفي هماليلة على نجد كله
ياخذ شهر وايام بليا زياده = سحب من الوسمي ودايم تعله
ودياننا بسدير تمشي بركاده = وحلالنا يربع وهو في محله
والبعل ياخذ من تلاعه سداده = والغرس عذقه يالله انك تشيله
وفلاحنا يرتاح عقب القراده = لا جيت له نفسيته مستهله
وسط العريش اللي يشوقك براده = من خير ربي لك سماط يفله
وتخضر ريضان تجيب السعاده = غدير وعشب منظره ما تمله
وخيمه بوسط الشاص بكامل عتاده = يمشي مع الوردي وقدمه يدله
اما شعيب وراط والا الحماده = والا الكسر لا من طرت لي نتله
والشوكي والتنهات ذي لي عاده = مثلي وجنسي مدهل له
وريضان بالصمان غاية مراده = والا عروق النفد وده وخله
وخريم ونوره والحقاقه زياده = وشعبان محارق مع شجرها المظله
مع نقوة عيال وفيهم جلاده = والعود الازرق مع بريق ودله
نلقى مشب النار بين رماده = ومن جمر الارطا قرص جمر نمله
والنوق حولك والفحل به قياده = حليبهن يشفيك من كل عله


رزت النخل يازين مع بيته الطين = كتمت سري والدموع احرجتني
البيت يشكي يوم عنه تغابين = والغرس هامل عقبكم ومتثني
من عقب ما به ريح طيب ورياحن = اصبح خرابه والغرب يوحشني
يا عمير وين اللي سكن به من سنين = الجادل اللي بالوصاله غمرني
اول ليا من جيت عاني يحيين = والحين غض العود شد وهجرني
شد ورحل ما ادري انا يمته وين = الله عليم بحالتي من تركني
الوردي ويا البيت والفرس حزنين = قمنا نتمنى ولا يفيد التمني
يا عمري تدري عن ظروف المحبين = لو اشتكي لغيرك حشا ما نفعني
في وقتها عمره ثلاثة وعشرين = مصنف من اللي بزينهن يذبحني
ما كننا بالحزم ما غيرنا اثنين = يمشي معي مشية دلع مع تثني
بنور القمر نسمر والاجواد ممسين = وخده يعكس النور لي وجهرني