ديوان الوردي

[الطائر المهاجر]

سلام الله على من شب ناره في ظلام الليل = على مجمار جنب الروض فيه دلال مركبه
على خد رفيع منزله جنب طريق السيل = ذبح له هرفي علقه في شنكار سحبيه
الى منه طلع بالنفد كنه فوق نهر النيل = رياض خضر من فضل الولى بالسيل ممليه
معه نقوة رجال ما تعرف القول ويالقيل = وخيمة جنبها جيب علاماته خليجيه
وعند عدة القنص من شوزل الى دربيل = يعس الخد والوديان يقنص كل عصريه
على يمناه ابن عناز من قوم تعسف الخيل = فهد ولد العقيلي خوته بالحيل نشريه
ومن قحطان ابوخالد وسيف مذبحين الحيل = وابوتركي وعايض من بني مفلح وفهديه
يقوله شاعر شعره عدال ولا يجيه الميل = من آهل سدير شاعر يعتز عزوة تميمه


أبتدي باسم الولي رب خلقنا = خلق خلقه وخلقه يعبدونه
نبذل المجهود كله ما ذخرنا = والشعر لأهل الوفا يستاهلونه
وانظم بيوت قوية ما اتانا = اشكر بها واحد بي تعرفونه
منسبه معروف وحنا ما جهلنا = مشرفي تميمي ما تاصلونه
من سلالة شيخ به ياما فخرنا = عن حقوق الله ما جته المهونة
يوم شفته قلت ذا فينا ومنا = وحده اللي كلكم تعرفونه
الإمام اللي عن البدعة عدلنا = منهجه بين المناهج تدرسونه
بعد ربي له فضل فيه اعترفنا = مثله وشرواه فضله تفهمونه
ذي شهادة حق وحنا ما جحدنا = ومن يقول الحق قوله تقبلونه
وصالح آل الشيخ هو محقق طلبنا = مثل ضلع طويق للي يزبنونه
يوم جينا مكتبه عنده دخلنا = قال تم للي حضرتوا تطلبونه
مثل هذا بالحمية ما خبرنا = اشهد انه للوفا رمز ونمونه
مثله وشرواه بيحقق املنا = للوفا سباق ماهم يسبقونه
شيخنا قيدو منا مهما مدحنا = مثله الشعار غصب يمدحونه
للصخا والجود صحونه تثنا = حاتم الطائي وذا له نمونه
تحتها السفره وفيها ما تمنى = العرب من جاد فعله يذكرونه
والمباخر جمرها عوده عمسنا = ينتقون الزين وفيها يجدعونه
ربعي آل الشيخ والله واجهتنا = من يجاريهم حشا بي يتعبونه
بالشعر لامثالهم مهما قصدنا = فعلهم كايد ونقصر غصب دونه
حظنا اللي قدنا لمثله عرفنا = بمجلس الاخيار يوم هم يكرمونه
ساعة مبروكة فيها حضرنا = مع وجيه رجال من جا يقدرونه
والختم صلوا على خاتم رسلنا = عد ما نور برق هلت مزونه
المصطفى اللي لدعوته حنا استجبنا = مرسله ربي لخلقه يعبدونه

الشاعر/ عبد الرحمن الرميح (الراوي)



انا بنشدك يالوردي = وخبرني بكل وضوح
ياحيثك تفهم الوجدي = وقلبك بالهوى مجروح
عن اللي بيح الدي = بيب زاد في الفوح
الى من شفته معدي = تحير الرجل وين تروح
اشوفه بين الصدي = وهو مابه لنا مصلوح
تراني واصلٍ حدي = زهقت من البكا والنوح
انا وضحت ما عندي = وخبرني بكل وضوح

الشاعر/ حمد بن عبدالرحمن المغامس (الوردي)



لكم يالراوي أبا اهدي = طريقة تكسب المملوح
يا حيثك شاعر قدي = وكل شي بيننا مسموح
اذا زهم وردي الخدي = تكلم جد بدون مزوح
خذه باللين والشدي = وتأكد وين هو يروح
الى من شفته مهدي = فقله يا حبيب الروح
تفضل نضبط المندي = بشوفك خاطري مشروح
حذارى من هل الحسدي = ومن عذال ومن مشفوح


color=#FF0000]الراوي[/color]



سلام الله على الوردي سلام ما يشيله جموس = من اقصى القلب اهلي به واحب اسمع ترانيمه
كريم وشاعر حساس مرهف واضح كالشمس = يحب اهل الوفى والجود والتقدير والشيمه
على كبد الرفيق احلى من الفنجال للي عمس = وعلى قلب العدو احر من صواريمه
الى منه عطاك العلم كنه قاضبه بالخمس = طلامه ثابت ما فيه ترجيعه وتقديمه
اعرفه من زمان فات ماهي معرفة قبل امس = وافاخر في رفاقة صاحبي جعل الله يديمه
عسى من يكرهه يطمس على قلبه وفكره طمس = مع العربان يمشي بالشوارع كنه بهيمه

الوردي


تحية خالصة مني عدد حب نثر للحمس = نوديها الى الراوي ومعها الف تسليمه
يا حيثه مرهف بوصفه نا عم الملمس = بيوت الشعر ينظمها تهامل كنها الديمه
حبيب عاقل نا يعرف الهمزات ويالهمس = نجيه بدكته بالصيف والى جا البرد بالخيمة
يحب مجالس الخير ولا يعطي وجه للنمس = ليا جاله مسير دايم يفرح بتكريمه
عسى من يبغضه في سمن فايح بالقدر يغمس = يا حيثه خايس مايعرف اهل القدر والشيمه
وسدك لا وصل له يكتمه لك كتمه الترمس = ويحبونه جميع الربع وله مقدار مع قيمه


لأهل الزلفي تحية وتقدير = اقولها ما دام جالي مجالي
لامن دعوني ماتهم المشاوير = الكل منهم له معزة وغالي
نجيب دعوة هالوجيه المسافير = اهل الوفا والجود روس الرجالي
العود الأزرق عندهم بالمباخير = وبهار وعويدي بصفر الدلالي
لاجل الكرم ما حسبوا للمخاسير = ولجل المراجل مرخصين الريالي
ولا عندهم في واجب الضيف تقصير = كل يحسب حساب لاية خمالي
قطاعة الفرجة بوقت المغاتير = رجاله يدوى جنوب وشمالي
من جى لهم في لازم له لقى خير = ومن جى يبي فزعات ياهم لالي
وان جى مجال العلم منهم مشاهير = ماكر حرار منزله دوم عالي
وان جى مجال الفعل منهم مناعير = خصيمهم يلقى الغثا والوبالي
يشهد لهمشاعر لفاهم من سدير = افعالهم تعرف من اول وتالي
في مركز صيفي رسم خطة السير = نشاطهم مدروس فيه اعتدالي
ادارته نقوه وغلطت على الغير = بالجد والاخلاص مضرب الجلالي
شهادة الله من غير تزوير = ويشهد على ما اقول رب الجلالي
وختامها تعداد ما غرد الطير = صلوا على من حارب اهل الظلالي


يا مرحبا باللي لفى الغاط زوار = عبد العزيز اللي حضر باختياره
اميرنا المحبوب قيدوم الاخيار = جده ابو تركي موحد دياره
وابوه دايم للوطن دره وستار = من غرته نفسه كرب له عياره
في عهده الميمون كل الرخا صار = وخدمة بيوت الله هدفه وشعاره
جزل ولد جزل مشاريعه كبار = لجل الوطن سهران ليل ونهاره
خلف عيال علهم طول الاعمار = في خدمته يمشون رهن الاشاره
يا اميرنا ياللي من طويلين الاشبار = الله عطاك اسلوب لطف ومهاره
يحميك رب البيت من كل الاقدار = فضلك شمل في كل حي وحاره
حتى المريض تزيل همه والاكدار = ونفسيته ترتاح عقب انهياره
يمناك لاجل الخير مداتها كثار = كريم سبلا زايد عنه شاره
كم واحد يشكي الحال محتار = باذن الولي علاجه تصدر قراره
ما هي كثيرة منك يا نسل الاحرار = مثلك وجنسك للوطن هم عمارة
حر ولد حر كريم وصبار = صاحب سمو ما تغير مساره
نبي نقول الحق لو كان اسرار = ننصف بها اللي ما يحسب خساره
اللي له افعال تجي عنه الاخبار = مثل المطر لا طاح بين خضاره
نبي نعبر عن فرحنا بالاشعار = لعبد العزيز بن فهد بالزياره
ونعلن فرحنا كلنا كبار وصغار = ونمسك ضفوف اللعب لا طق طاره
هذي مشاعر قلتها سر وجهار = لاميرنا المحبوب ساس الاماره
تمت بذكر اللي قهر كل الاشرار = تعداد من صلى ببيته وزاره


كل شاعر ثلاث ايام له يكرف = مجتهد لا يجي له غمزة ولمزه
من عذي الوافي قايم يخرف = يا زن البيت بالكسرات والهمزة
من بحور الشعر ذا اليوم ابي نغرف = وظيفنا لا وصل نفز له فزه
مرحبا يالوزير اللي حضر شرف = له قدر عندنا بالحيل ونعزه
شيخنا اللي لفانا جده نشرف = نور تمير ومجزل الى خزه
جده اللي لدينه قام وتصرف = حارب اهل البدع عنا الجهل كزه
لاحظ ان العقيدة كنها تحرف = عدل اللي رضخ لبليس الى غزه
ساقه الله لحاكم نجد وتعرف = كل عاصي معاند سيفه يجزه
كل متفوق بالعلم يتشرف = يسلمه جايزه تدعمه وتحفزه
من تمتم النسب ما هوب متطرف = كنه طويق الى جا الريح ما هزه
مجلسه فاتحه والباب ما طرف = من بحور المعرفه نظحه ونزه
ما تجي لك وجاهة وانت متعجرف = مثل صالح عن اللي قلت متنزه
لاجل دينه خصص البند والمصرف = الفهد وكله يا عله بعزه
وكل فايز لمحنه ظرفه مظرف = من ابن سلطان جابه للحفل دزه
اشهد انه حرار وانتهض رفرف = كل علم غانم عينه تخزه
مانلومه الى منه خسر واسرف = يده بيضى ولا به زمره ورزه


شيك على الجكسار بالزيت يا عمير = ومل التوانك كلها بانزيني
قبل طلوع الشمس حرك من سدير = يم المزاين صوب ذرب اليميني
عده عن الميه ولا تهدي السير = خذنا رقم واحد وبه فايزيني
تميم حامة بالسما حومة الطير = في وقتنا الحاضر وقدم السنيني
يقولها الوردي وساق التباشير = يجر صوته يسمع السامعيني
شاعر كبير ينعرف ماهو صغير = حضر مع للي للحفل حاضريني
بارك لابن عمه بزين التعابير = ومهما نقوله كلنا مقصريني
عبدالله آل الشيخ راس المشاهير = ابن مشرف له فعول تبيني
له شهرة غطت على سالم الزير = الله يفكه من حسد حاسديني
نسل الامام اللي جمعنا على الخير = لدرب العقيدة وجه الجاهليني
القصد واضح مايبي له تفاسير = بعهد الفهد صرنا بدنيا وديني
يابو محمد جوك الوجيه المسافير = في مجلسك حولك يسار ويميني
شفنا مجاهيمك تتالى طوابير = بوسم لنا بارقابهن جاهميني
في زينهن قمنا ندير التفاكير = خلاقهن رب البشر اجمعيني
سبحان رب صور البل تصوير = ثم ذكرها بالكتاب المبيني
فيهن مجاهيم وشعل ومغاتير = وحنا لمجاهيم الحفل كاسبيني
انجاز للتاريخ بدون تسطير = وسط المكاتب بدرب الدرابيني
يا مقلط الحشوان لجل المسايير = روس الرجال اللي لك مسيريني
ياللي رفعت العود وشعر المباخير = مثلك وجنسك للكرم مرتكيني
خذت الزعامة منفرد ما معك غير = من القوم قوله والربع قايليني
شهادة من غير شك وتزوير = من شاعر هرجه قوي قايليني

الشاعر/ ناصر عبدالله السعيد


حنا الرفيق اللي نوده ونغليه = اصبح يشح بجيته ما يسير
ياريح منا لبو دحيم وش فيه = انشده قله وش علامه تغير
هذا الزمان ما عرفنا تواليه = لا والله اللي صرت منه متحير
اللي تمكن من ضميري مبانيه = اشره عليه ونلحق اللوم خير
حتى سلام العيد ما عاد يديه = وهو يعرف الحق والحق نير
يا ابن مغامس عندنا رضاك نشريه = صيحة مهداة لك ما تحير
احذر من اللي يخدعك في حكاويه = يضحك وهو ذيب عليك متدير
لابد وقتك ما تبين خوافيه = والعبد في دبرة وليه مسير
جرح جرحته لازم انك تداويه = والا نروح الشرع وانتا مخير
ياقلب ياللي زايدات مكاويه = بالك تشائم من ربوعك تطير
ملزوم تدمح زلة اللي تراعيه = لاجل الغلا يصبح غلاهم صغير

الشاعر/ حمد بن عبدالرحمن المغامس (الوردي)



يا ناصر آل سعيد هذا الزعل ليه = جيتك مع الوادي تركت المقير
مثلك وجنسك شاعر ما نخله = جهز لنا الدلة وشاهي مسير
في ملكك اللي دايم به تواليه = شرق شمال من شعيب الحوير
رفيقي افخر به ليا حل طاريه = شرهتك ذي اظن به تعير
راعي الهروج الفاضية ما نخاويه = مانيب انا لشرواه جدار قصير
وراع الصلة بالعيد مانيب لاقيه = مع لابته صغير هم وكبير
رفيقنا كانه زعل حق نرضيه = احكم ونرضى رايكم دون نير
اللي تحكم به لازم ناديه = حنا هدفنا رضاك وطب وتخير
صاحبك يم الشرع حذرا تمشيه = عن جلسة وياك عنها تذير
وانت الحكيم اللي مكمله واليه = بسلم المراجل مثلكم ما تحير


شاعر مع الشعار ينظم له ابيات = لا جا مجامل الجد صارت قويه
يابن عزب عندي بيوت عذيات = باهل الصخا والجود ويا الحميه
لاهل الكويت اهدي سلام وتحيات = تعداد من زار الحرم بالضحيه
يشهد علي اللي يعلم الخفيات = الواحد المعبود رب البريه
اخوان مريم كاسبين الطويلات = ذكري محاسنهم صعبة عليه
من غير جابر يا يحل الصعيبات = خلى الكويت اليوم تصبح غنيه
حبه لها ما فيه شك وريبات = غيره ينام وعبن جابر شقيه
لاجل الوطن مشغول بروحه وجيات = همه يبي شعبه حياته هنيه
رايه سديد وفاهم بالسياسات = مثله وجنسه يايحل القضية
وقت مضى يوم الموارد قليلات = لكويت يردونه ولو بالمطيه
فيهم رجال مذبحين السمينات = ما قلطوا للضيف وحدة رديه
يجزاهم المعبود رب البريات = اللي يعلم اشيا علينا خفيه
وختامها مني تحية منقات = للي سمع شعري شكر مع تحيه