إن كان تجهل يالمضيّع وش الطير(شيله)

[الطائر المهاجر]

كيبورديه

إن كان تجهل يالمضيّع وش الطير = فالطير حرّ وعاليٍ في رجومه
طيرٍ مهاجر بالفكر والتدابير = بحرٍ غزير لا تهقوى تعومه
قلبه نظيف ولا حمل حقد للغير= يدمح خطا اللي جاهلٍ في علومه
يحب لغيره ما يحبه من الخير = ولاهوب اناني كل همه سهومه
ماشي على نهج الرجال المناعير= بدرب التواضع واضحاتٍ رسومه
ثابت على مبداه من غير تغيير = ولا اغتر في علمه وعالي نجومه
يشيل هم الغير فعلٍ وتفكير= ويضحك ولو هي ذابحاته همومه
وسيع صدر ولو تحداه طرطير= خذه على قدّ العقل ما يلومه
ويثور كالبركان من دون تحذير= لاشاف بومٍ صار يطرد لبومه
ولا شاف متذيكي نوى خبث تدبير= ولا شاف ابو وجهين رابح بسومه
ولا شاف تاجر دين يخدع بتكبير= من لاعرف اهداف حجه وصومه
ولا شاف من يحظى بجاه وتقدير= وهو حرامي كاشفاته هدومه
ويعلي سهوم اللي نظيف التقارير= درب الفضيله مسلكه بين قومه
ماهوب من يغتاب او ينفخ الكير = شجاع نحريرٍ يقدر خصومه
دنياه ما تسوى ولو ربع قطمير= زاهد بها عايش على رزق يومه
هذي علومه كان تنشد عن الطير= يخاف ربه واضحٍ في علومه

[داعي الشوق]

	كفو يا بو عبدالله كفو رايتك بيضاء و ( ياجبل ما يهزك ريح ) صح لسانك ثم صح لسانك ثم صح لسانك قصيدة شاملة لكل معنى وافيه يالوافي دمت بخير

[نجم الإبداع]

الله الله

صح لسانك مدد

كفو يابو عبدالله

وصوره راقيه

انا اشهد انك مبدع ووافي

لاهنت

تقبل مروري

وتقديري

[عبدالله الشويمان]

الله الله يا ابو عبدالله

نص يحكي عن الذات الراقيه..كفو كفو

صح السانك واعتلا شأنك

ولا هنت

ابوعبدالله

صح لسانك

وجاد بيانك

قصيدة متألقه

طيرٍ مهاجـر بالفكـر والتدابيـر
وبحرٍ غزير ما بكلٍ يعومه

كفوووو ...ولاهنت

وعساك على القوه يابوعبدالله

تقبل تحياتي

[عبدالله السويلم]

صح لسانك ثم صح لسانك ثم صح لسانك

والنعم والله يابوعبدالله
قصيده رائعه تحكي الواقع يالغالي
تحياتي لك

[دايود صالح الخلف]

ابو عبدالله

والف ونعم والله
وصح لسانك
ولاهنت
بيض الله وجهك
يامبدع

[عبدالله مذكر العقيلي]

ابو عبدالله

شاعر كبير ولافيك حيله

والقصيده جزله ومن الوزن الثقيل

ولكن لدي ملاحظه : اعتقد انك نسيت كلمه في الشطر الاخير او خطى املائي حصل منك بدون قصد

هذي علومه كان تنشد عن الطير
................لعل تفهم ماخفى علومه

اعتقد لوكتبت لعل تفهم ماخفى من علومه

والله اعلم


ارجو ان تقبلها بصدرٍ رحب


تحيتي

[الطائر المهاجر]

شكرا لملاحظتك اخي عبدالله
فقد سقطت "من" مع الطباعه
لاهنت
تحياتي

[عبدالله مذكر العقيلي]

ابو عبد الله

الكبير كبير مهما حصل من نسيان

جزله من راس جزل

وكفووووووووووووو

صح لسانك وفكرك

دمت مبدع