يقولون التميمي ما يضيق

[الطائر المهاجر]

يقولون التميمي ما يضيق وخاطره مرتاح = تحضّر من بعَد ذيك البداوه وانتهى دوره
واقول إن التميمي ثابت المبدا ولا انزاح = ولو وصل القمر ما غيّر بفكره ومنظوره
شهامه في رجوله والكرم من عادته ما راح = وشجاعه مايهاب الموت في لحظات مخطوره
له التاريخ يشهد له ولو ما سجّله بالواح = على صدر الزمن يكتب فعالٍ دوم محفوره
يضيق الحر لا من شاف بوم الأمس بالافراح = غدا يرفع عيونه من بعد ماهيب مكسوره
ويضيق الحر من وقتٍ غدينا في يده مسباح= يصرّفنا على كيفه ولاحدٍ وقّف بزوره
تناهشنا بغاث الطير نشعر بالأسى وجراح= ولا من حيلةٍ إلا نعيش بآه مقهوره
ولكن من تميم المجد يشرق فجرنا الوضّاح= اذا صاح التميمي صيحته بركان يالثوره
تعودنا بلوغ المجد لو نرخص له الأرواح = نقود العرب ما ننقاد حنا الأصل لا الصوره
يلوموني إذا قلت التميمي للدجى مصباح = يضئ الكون من مجدٍ يشع ولاانطفى نوره