بشوووووويش

شاكـر محمـد · 08-11-2012, 02:28 PM

بشويش ...تكفى خل ضحكتك بشويش= اخاف يصحى اللي من العام نايم
اللي بقلبي غصب له باني عشيش= وعنده على موقعه تمليك دايم
جرحن مسوي بي هوايل ..على ويش= ماني بخابر جاه مني ظلايم
سبعة سنين وهو مقوّم علي جيش= ولا هو ذبحني ولا شبع بي هزايم
جيشه صدود وشك لوعه وتطنيش=وبالغبن وسّم في قليبي وسايم
ولا كنت أظن اني منه ممكن اعيش= ولا ني بداري كيف نام وتلايم
وفي ناصية قلبي فرش ناعم الريش=توسّد الشريان بارضن عدايم
ودام انها ملكه فلا قلت له ليش=عساه بس يرقد ونومه نعايم
لكنها ضحكتك في صدري تجيش= ما كني الا اسمع هديل الحمايم
وأحيان يطرأ لي سواليف تحشيش=احس نفسي فوق الامواج عايم
تخيلي تحشيش،تجييش،مدري ايش=لا والله الا للمشاعر عزايم
اضحك على كيفك ومن غير بشويش= ضحكتك صحّت جرح من عام نايم