العودة   منتديات الفطاحله > المنتديات العامة/يمنع الفيديو > سفر وسياحه ومعلومات جغرافيه

إضافة رد
 
أدوات الموضوع
قديم 13-01-2006, 03:23 PM   رقم المشاركة : 1
ابو ياسر




معلومات إضافية
  النقاط :
  الحالة :

 

افتراضي اسبرانزا و معركة القاهرة


السلام عليكم ورحمة الله



اسبرانزا و معركة القاهرة


(اضغطو على جميع صور الموضوع لمشاهدتها بحجم اكبر)







يمكن إذا قريتوا اسم الموضوع بتقولون وش السالفة هو انت رايح تبي تزور القاهرة ولا رايح تحارب ، عشان كذا بعطيكم سبب تسميتي للموضوع بالشكل هذا.

إنا الي قبل 15 يوم من ألان لو تقولون لي رح لم مصر كان قلت لكم ما أروح لها لو ما بقا في الدنيا ديره غيرها ، لا تلوموني على التفكير و الاعتقاد هذا ، الكلام اللي كنت أسمعه من بعض الزملاء اللي راحوا لم مصر و بعض اللي كنت اقرأه عنها كان يهول و يخوف و يسبب ازعاج للشخص حتي قبل ما يروح لها.

تصوروا الليلة اللي قررت أروح فيها للقاهرة قابلت بعض الزملاء في الاستراحة و مسكوني واحد واحد و خذ نصايح و تعليمات الين وجعني بطني من الديره و بغيت اهون في ذيك الليلة نفسها.

من بعض ما قالوه الربع الزملاء كان ما يلي:

-) انتبة لا تأكل من أكلهم ترا يجيلك تسمم على طول! ( طيب انا اذا ما أكلت من أكلهم وين أكل فيه؟).

-) ترا الشحاتين بيغثونك و بينشبون فيك ، انتبه لا تعطيهم شي ولا تكومو عليك و يمكن يسرقونك.

-) ترا ألديره ما تمشي إلا بالبخشيش ، اذا كنت تبي امورك تمشي بخششهم ولا تراك تعطلت.

-) ترا الشيش اللي عندهم كلها شينة و بتصدع منها على طول.

-) ترا بينلعب عليك في التكاسي ولا بيدك حيلة.

-) اذا بغيت تشتري شي في المحلات تراهم بيزيدون عليك الاسعار ، اذا شفت السعر غالي لا تشتري من احد (طيب وين اشتري منه؟).

-) انتبه لين بغيت تقطع الشارع ، ترا السيارات ما توقف لحد و اكيد بيصدمونك.

-) لا تشيل معك فلوس و خل دراهمك في الفندق.

-) وزع دراهمك في مخابيك ولا تخليها كلها في مخبات وحده.

-) صفط الجنيهات على واحد واحد و حطهن في مخبات و صفط الخمس جنيهات بنفس الطريقة و حطها في مخبات ثانية ، و سو نفس الشي بالعشرة و العشرين و الخمسين و المائة جنية ( انا وين اجيب كل المخابي هذي ، يبي لي البس بنطلونين على السالفة هذي!).

-) قفل الباب من جوا اذا ركبت في السيارة.

-) اذا جاك واحد و معه سكين و قال لك عطني دراهمك عطها له ولا تقاومه.

عاد بعد كل النصايح هذي تلوموني على اني اقول اني رايح لم معركة في القاهرة، ولا وش رايكم.

______________________________ _________

هذي مقدمة للموضوع اللي انا قاعد اجهز فيه عن رحلتي اللي انا توي جاى منها من القاهرة.
الموضوع و تعذروني على الشي هذا بيكون طويل و بياخذ مني الكثير من الوقت لكن ابحاول بقدر المستطاع اني اخلصة لكم في اقصر مده ممكنة.

اللي إلقاء في اول أجزاء الموضوع.






توقيع ابو ياسر
 
  رد مع اقتباس
قديم 13-01-2006, 10:55 PM   رقم المشاركة : 2
ثار التميميه
V.I.P مؤسس
 الصورة الرمزية ثار التميميه





معلومات إضافية
  النقاط : 20
  الحالة :ثار التميميه غير متواجد حالياً

 

افتراضي


شكلها تحمس هالرحله

بس صدق يبي لك تفصل جينز بست جيوب







توقيع ثار التميميه
 
  رد مع اقتباس
قديم 14-01-2006, 10:29 AM   رقم المشاركة : 3
ذيب السنافي




معلومات إضافية
  النقاط :
  الحالة :

 

افتراضي


هلا اسبرانزا يابعد حيي يالله يالغلا جب الرحله

ترانا بننتظر هنا وبيطقنا السكني أن تأخرت لا تتأخر







توقيع ذيب السنافي
 
  رد مع اقتباس
قديم 15-01-2006, 04:15 PM   رقم المشاركة : 4
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي


اجل ما قالوا لك إذا وقفوك الشرطة لا توقف تراهم مهمب شرطة ولكن نصابين ، وعليهم بدل عسكريه ومعهم سيارة شرطة. اما ان قروشك تخدمك فهذا صحيح ، ويكفي إنه سافر معي واحد ، يوم وصلنا والا موكب كامل ينتظره
بالونانات والسيارة اللي عليها أعلام ، وهو شخص عادي ، لكن يدفع فلوس.. وطالما هذي أول زيارة لك وما سكنت إلا في فندق 5 نجوم ، فتراك مارحت لمصر!!
لعلي اتكلم عنها في رحلاتي ، فمعلوماتي عنها واجد..
تحياتي







توقيع الطائر المهاجر
 
تفاعلك مع غيرك يشجعهم على التفاعل معك
  رد مع اقتباس
قديم 15-01-2006, 07:04 PM   رقم المشاركة : 5
ابو ياسر




معلومات إضافية
  النقاط :
  الحالة :

 

افتراضي


ثار التميميه

انشاءالله الموضوع بالفعل يعجبك عند اكتمالة.

اما سالفة المخابي الكثيرة فصار اللي قال لي الكلام هذا من جنبها.




ذيب السنافي

افا يا الذيب تخاف من السكني

لا ابشر بسعدك هذا الجزء الاول من الموضوع بيمزل الحين



المشرف العام

هلا ببو عبدالله.

الحين دامك خبير في الديرة وراك ما جيت معي يوم اني قلت لك <<<<< (تراني ما قلت له الا ونا في القاهرة )

و من ناحية ان دراهمك تخدمك فنا اشهد والله.

بالنسبة للفندق الخمس نجوم ، فهذا شي لزوم اذا الواحد سافر و معه زوجته ، هو لو انا رايح بلحالي كان سكنت على الرصيف و صرت اسبرانزا في الشارع


لكم الشكر و التحية







توقيع ابو ياسر
 
  رد مع اقتباس
قديم 15-01-2006, 07:13 PM   رقم المشاركة : 6
ابو ياسر




معلومات إضافية
  النقاط :
  الحالة :

 

افتراضي


اسبرانزا و معركة القاهرة


- الجزء الأول -




روحتي للقاهرة كانت بدون أي تخطيط أو تجهيز ، كانت وليدة الساعة زي ما يقولون .

يوم الجمعة 15/7/2005 و بعد ما تغديت و عمرت الراس براس باشا يحبه قلبكم ، بديت اهوجس في خته لي انا و المعزبة في إجازة قصيرة و سريعة ( مديري في العمل كان قايل لي لا توريني وجهك الا بعد 15 يوم و بدون ما تقدم إجازة هدية من عندي) ، المشكلة ان مديري ما قال لي الكلام هذا الا يوم الربوع ، يعني ما كان عندي وقت اخطط أي رحلة لاي مكان ، انا ما اخفي عليكم كان ودي اروح لم فانكوفر و تسبدي تقاطر عليها ، بس المشكلة ان فانكوفر كانت محتاجة تأشيرة ، و التأشيرة يبي لها على الأقل أسبوع.

المهم بعد اخذ و عطاء مع المعزبة في الموضوع أقنعتني نروح للقاهرة على يوم الثلوث او الربوع القادم ، اتصلت على مكتب الحجوزات حقت السعودية عشان احجز لي كرسيين .

و فيما يلي الحوار اللي دار بيني و بين موظف حجز السعودية:


موظف الحجز: حجز الخطوط السعودية ، عبداللـه العتيبي.
اسبرانزا: السلام عليكم اخوي عبداللـه ، تكفاء و اللي يرحم والديك شف لي كرسيين على اقرب رحلة من الرياض الي القاهرة.
موظف الحجز: اجل عجل تبي تروح للقاهرة ، شكل الحر ذابحك.
اسبرانزا: أي والله يا اخوي عبداللـه الحر ذبحنا في الرياض و ناوي اتبرد في القاهرة (يعني انا وش كنت ابرد علية و اقول ، طنشو بس)
موظف الحجز: اقرب كرسيين متوفرة بتكون السبت 23/7/2005.
اسبرانزا: افاااا يا عبداللـه الله يخلي لك العجيز و الشايب ، شف لي موعد اقرب من هذا.
موظف الحجز: الاسم الكريم لو سمحت.
اسبرانزا: (افاا ورآه يسأل عن اسمي شكلي رحت فيها) ، انا اسمي اسبرانزا يا خوي عبداللـه.
موظف الحجز: اسبرانزا؟؟ ، اسبرانزا ولد مين.
اسبرانزا: (شكلة يحسبني شخص مهم) ، انا اسبرانزا ولد ابو اسبرانزا.
موظف الحجز: اييييييه ، وانعم يا اسبرانزا ( شكله وده يقول و ما قالت) ، الحقيقة هذا اقرب موعد فيه كراسي مؤكده.
اسبرانزا: طيب لحظه تكفاء خلني اشاور المعزبة.
موظف الحجز: بتشاور المعزبة!! ،، اية خذ راحتك.


الحوار التالي دار بيني و بين المعزبة:

اسبرانزا: حبيبتي يا بعد روحي ، مافيه حجز على السياحية للقاهرة ، نهون و نقعد في الرياض.
المعزبة: والله اللي ما قعدت في الرياض ، تبي انت تقعد في الرياض اقعد و انا اروح مع اهلي ، هم يدبرون لي حجز.
اسبرانزا: يا بعد قلبي انا مقدر استغني عنك ولو دقيقة وشلون تخليني و تروحين مع اهلك.
المعزبة: اذا ما تبيني اخليك بلحالك يا اسبرانزا ، دبر نفسك و شف لنا حجز ولو على الدرجة الأولي.
اسبرانزا: ابشري يا حياتي ، احجز لك على الأولي لو أروح أبيع الهوندا عشان اشتري التذاكر.


رجعت و كلمت موظف الحجز ، و دار الحوار التالي:

اسبرانزا: اخوي عبداللـه شف لي حجز على اقرب رحلة لو على الأفق او الأولي ( نغزتني المعزبة و هي مكشرة و قالت الاولي بس) ، ولا اقول اخوي عبداللـه خلها على الاولي بس.
موظف الحجز: طيب ، خلك معي ثواني ،،،،، اقرب حجز بكره السبت الساعة 0750 في الصباح.
اسبرانزا: لا هذي قريبة مره ،،، شف لي شي بعد يومين او ثلاثة.
موظف الحجز: مافيه حجز على الأولي الا بكره ، و اقرب موعد بعد كذا بيكون يوم الثلاثاء 26/7/2005.
اسبرانزا: (والله مشكلة ، بكره قريب مره) طيب ما فيه حل ثاني احجز لي على رحلت بكره.


بعد صلات العصر نقزت لم مكتب الذياب للسفر و السياحة اللي جمب البيت و محطني بسعر 8500 ريال ذهاب و إياب على الأولي للقاهرة.
يوم شفت السعر غالي كذا قلت للهندي حق المكتب اجل خل الروحة على الأولي و الرجعة على السياحية، و نزل السعر الي مبلغ 7000 ريال.

شريت التذاكر و رجعت للبيت ، المعزبة يوم شافت التذاكر و تطير من الفرحة و تقول لي يدك على 2000 ريال عشان أروح اشتري لي ملابس للسفر.
بغيت أقول للمعزبة يوم طلبت الدراهم ورا ما تاخذين من ملابسك اللي تارسة الدالوب ابو عشر درف ، بس قلت النفسي اشتر نفسك يا اسبرانزا و عطها اللي تبي لا تروح فيها.

ثاني يوم اللي هو يوم السبت ، يوم الرحلة طلعت انا و المعزبة لم المطار من الساعة 0530 في الصبح عشان ما نتأخر ، يوم وصلت للمطار و أنادي لي هندي عشان يشيل العفش و رحت لم الكاونتر حق قص البوردانق باس ، و انا أروح أماسك سراء مع اللي ماسكين سراء، سألني الهندي اللي شايل العفش هي تذكرتي أي درجة ، فقلت له و انا طاق ذيك الابتسامة العريضة ، درجة أولي يا صديق ، ناظرني الهندي ذيك النظرة الغريبة و مدري ليه كان وده يصفقني و سحبني من يد و وداني لم كاونتر ثاني ما كان فيه احد.
طلع فيه كاونتر خاص بلي يسافرون على الدرجة الأولي و انا ما ادري (لا تشرهون ترا عمري ما سفرت درجة أولي).

قصيت البوردنق باس و رحت للجوازات و خلصت منهم ، بعدين رحت و قعدت على الكراسي اللي عند البوابة حقت طيارة القاهرة.
و انا جالس على الكراسي عند البوابة قلت للمعزة وري ما نروح نتمشي في المطار و نستمتع بطريقة عمرانه الفريدة ، واحنا نتمشي لقيت صالة مكتوب عليها لركاب الدرجة الأولي ، انا مدري وشي الصالة هذي ، فرحت لمهم و اكتشفت انها للمسافرين على الدرجة الأولي ، يقعدون فيها على كنباتها المريحة بدال الكراسي الحديد اللي عند البوابة ، و زيادة على كذا كان في الصالة اكل و شرب ببلاش.

بعد ما قعدت في الصالة حدود نصف ساعة ، اعلن المذيع الداخلي حق المطار بموعد إقلاع رحلتي ، اخذت المعزبة مع يدها و ركبنا الطيارة.

يا الدرجة الأولي تونس و زينة ، كراسيها كبر كراسي السياحة بربع مرات ، و من كبرها اذا جيت اباخذ المجلة اللي في مخبات الكرسي اللي قدامي لازم اقوم و امشي حول كيلو الين أوصل لها.

تقهوينا علي الطيارة و اكلنا من قدوعهم و افطرنا ذاك الفطور الزين , و انا مديت رجلين الكرسي حقي و فردت ظهر الكرسي الين صار تقل سرير .
هذا السفر ولا بلاش ، انا معادني مسافر الا درجة أولي بعد كذا.

طلعت الكميرة و نشبت في الدريشة عشان اصور المطار و الرياض من السماء ، بس ما قدرت لان الدنيا كانت معججة (عاصفة رملية) ذاك اليوم .




هذا كراسي الدرجة الأولي ، الدرجة الأولي ما كان فيها الا خمس ركاب.











بعد ما اقلعت الطيارة بحدود ساعة ، خف العج شوي ، فخذت الكم صوره هذي و الظاهر انها حول مدينة الوجه.





و الصوره هذا اول ما وصلنا للبحر الأحمر.





الطيارة مشت فوق البحر الأحمر حدود نصف ساعة قبل ما تدخل البر المصري من عند قناة السويس ، و هذي صوره لطرف الجزيرة العربية المقابل لسيناء .








اول ما دخلنا مصر بعد ما تعدينا مضيق السويس ، طلعت لنا السحب المتفرقة هذي. إشكالها كانت حلوه.









بعد ما دخلنا البر المصري بحدود الربع ساعة ، بدت الطيارة في الانخفاض ، و هذي صور السحب و إحنا نقرب منها و بعدين ندخل تحتها.











و هذي صور للقاهرة من الطيارة يوم قربنا منها.



هبطت الطيارة و أقوم امسك المعزبة من يدها و خذ ركض عشان أوصل للجوازات قبل الزحمة (واحد من الشباب موصيني على الشي هذا عشان ما يكون قدامي سرا طويل)
يوم وصلت للجوازات خفت ، لأنه ما كان فيه احد غيري و العالم كلهم كانو ورأي ، على طول نصيت واحد من الكونترات و أعطيت جوازي و جواز المعزبة لضابط مصري على كتفة 3 نجوم ، الضابط ختم الجوازات بعدين دسهم مع دريشة صغيره لم غرفة صغيره ورآه ، انا استغربت من الحركة هذي و رحت لم الغرفة الصغيرة اللي ورآه ولا فيها موظف مصري مدني قاعد يسجل بينات جوازي و جواز المعزبة على كمبيوتر (شكل الضابط ما كان يعرف يطبع).

بعد ما خلصت من الجوازات و أروح لم السير حق العفش و انتظر حدود 5 دقايق ، و اثنا انتظاري جاني احد العمال المصريين حقين عربيات العفش و سألني اذا انا ابي عربية ، فقلت له لا و رحت خذت عربية بنفسي (الشباب كانوا يقولون لي خذ عربيتك بنفسك لان العامل بيغثك و يطلب زود فلوس على تحميل العفش عن التسعيرة الموجودة) ، لذالك سمعت كلامهم و حملت عفشي بنفسي ، المهم شوي ولا السير حق العفش بدا يشتغل و طلعت شناطي هي اول الشناط اللي طلعت ( الظاهر فيه احد في مصر دارين اني جاي أزورهم و قال يدلعني شوي) ، طبعاً قيل لي بعدين ان شناط الدرجة الأولي هي اول الشناط اللي تطلع.

حملت عفشي و نصيت الباب اللي يطلع من المطار ، و أول ما طلعت مع الباب لفيت يمين لم كاونترات سيارات التكسي حقت المطار (يسمونها ليموزينات و هي مغير هوندايات اكسنت او كورلات) ، اول ما شافوني و حتي قبل ما اصل الكاونتر ولا ذاك المصري ناقز لي و معه دفتر فواتير و سألني "البية رايح فين" قلت له فندق الكونراد فقال لي السعر 66 جنية ، تركته و رحت و خليته (الشباب كانوا قايلين لي ان سعر التوصيلة مفروض ما تزيد عن 45 جنية) ، المهم جاني واحد ثاني و قال لي سعر التوصيلة 57 جنية ، فقلت له ما يخالف و اكيد ارتفاع السعر هو بسبب الموسم السياحي.

دفعت المبلغ لواحد إعطاني فاتورة و طلب مني الحقة ، لحقته فطلعنا برا مبني المطار على الشارع و قال لي انتظر الين يجي اليموزين ، اثنا انتظاري لاحظت شي غريب انه مافية سيارات تمر ، كان فيه فقط باصات تمر كل كم دقيقة ، سألت عن الشي هذا فقالو لي ان هذا تنظيم جديد و انه فقط الباصات تجي هنا و تاخذ الركاب الي مواقف السيارات بالإضافة الي سيارات اليموزين الخاصة بالمطار.

بعد حدود 10 دقايق من الانتظار ولا سيارة اليموزين جاية (طلعت كيا كورية من الصغار) ، ما امدا سواق السيارة يوقف و يفتح الشنطة عشان احط العفش الا و ذوليك الثلاثة اللي مدري وين جو منه امتناقزين و ماخذين عفشي و محملينه في الشنطة حقت السيارة ، بصراحة انا اندهشت من الخدمة الممتازة و قلت في نفسي انهم اكيد دارين اني كنت راكب درجة أولي في الطيارة ، اندهاشي ما طول لمن الثلاثة مسكو سرا قدامي قبل ما اركب السيارة و كل واحد ماد يده يبي المعلوم ، انا انحرجت قدامهم و دخلت يدي في المخبات اللي كنت مصفط فيها الجنيهات الواحد واحد و طلعت ثلاث جنيهات و أعطيت كل واحد منهم جنية.

حرك سواق التكسي من المطار بس قبل ما يطلع من منطقة المطار وقفنا عند عسكري كان جالس تحت مضلة صغيرة و سألني العسكري عن اسمي و وين انا رايح له ، كان العسكري يسجل المعلومات في دفتر معه و قال لي سواق التكسي ان السبب هو لو يصير لي شي او انساء عفشي يعرفون السيارة و السواق اللي وصلني ( انا اعجبتني الحركة هذي).

و انا في الطريق الي الفندق سألني السواق اذا كانت هذي أول مره اجي للقاهرة ، فقلت له اية ، هو ما صدق خبر و بدا يكلمني و يشرح لي عن كل شي نمر جمبة ، اكثر شي شد انتباهي ولا كنت متوقعة هو نظافة الطرق و الخضار اللي على جمبها ، الحقيقة كان مغاير لما توقعته ، من الاشياء الثانية اللي شدت انتباهي هو كبري طويل مشينا علية في السيارة ، يقول السواق ان طول الكبري 22 كيلو و يخترق القاهرة ، من الأشياء المثيرة على جوانب الكبري هي العماير و البيوت اللي لأزقة في الكبري على طول ، بحيث ان سكان البيوت و العماير هذي ممكن يطلعون من درايش او بلكونات بيوتهم على الكبري على طول.

وصلنا للفندق بعد حوالي 30 دقيقة ، الفندق كان يطل مباشرة على كورنيش النيل و موقعة كان حلو.





هذي صورت الفندق من الخلف.




عند مدخل الفندق كان فيه عساكر يفتشون كل سيارة رايحة للفندق.
دخلت للفندق و رحت للاستقبال و طلبت غرفة ، سألني موظف الاستقبال اذا كان عندي حجز فقلت له لا ( انا ما امداني أسوي أي حجوزات فنادق قبل ما اسافر) ، قال لي الموظف ان سعر الغرفة العادية هو 120 دولار من غير الضرائب و الخدمة و ان السعر هذا يزيد الي 160 دولار بعد يومين لانه يكون بداية الموسم السياحي عندهم.
سالت موظف الاستقبال الغرفة بتكون في أي دور فقال لي ان الغرف اللي بالسعر هذا تكون بين الدور الثالث و السابع ، انا ما جاز لي ان الغرفة ماهي في اعلى الفندق فقلت له اني ابي غرفة في الادوار العلي من الفندق ، رد على الموظف و قال ان الغرف في اعلى الفندق هي في منطقة الغرف التنفيذية (Executive) و ان سعر الغرفة هو 160 دولار و يزيد بعد يومين الي سعر 210 دولار بدون ضرائب او خدمة.

اخذت غرفة في الأدوار التنفيذية و كانت في الدور 21 ، بعدين طلب مني موظف الاستقبال جوازي و خذه و صوره و سألني اذا معي بطاقة ائتمان ، فقلت له لا ما معي فطلب مني مبلغ تحت الحساب مقداره 1000 دولار ، عطيته الفلوس فطلب مني شي يثبت ان المعزبة هي زوجتي ، اعتذرت منه و قلت له اني ما توقعت انكم بحاجة الي شي يثبت الشي هذا ، فقال لي ما فيه مشكلة.
اعطاني موظف الاستقبال كرتين لفتح باب الغرفة و بعدين اخذني احد موظفين الفندق اللي معه العفش للغرفة ، اصنسيرات الفندق عجيبة ولا تتحرك الين تحط فيها مفتاح الغرفة حقتك ، وصلت للغرفة و دخل الموظف العفش و بعدين جا لمي و عرفت انه يبي المقسوم ، قمت دخلت يدي في المخبات اللي فيها العشر جنيهات و طلعت له عشره جنية و أعطيتها له.





هذا صورت الممر اللي فيه الغرفة. و اعتذر منكم لاني ما عندي صور للغرفة.



رتبت عفشي في الغرفة و حطيت جوازي و تذكرتي و فلوسي في الخزنة حقت الغرفة.

بعدين طلعت لم بلكونت الغرفة و اخذت مجموعة الصور التالية.







هذا النيل و كورنيش النيل إمام الفندق.







هذي مباني مركز التجارة العالمي جمب الفندق.











هذي منطقة شبرا و وكالة البلح و ورش الحدادة خلف الفندق.





هذا الدور الثالث من الفندق و فيه المسبح و مطعم و جلسات حلوه.



اشوفكم في الجزء الثاني من معركتي في القاهرة.






توقيع ابو ياسر
 
  رد مع اقتباس
قديم 16-01-2006, 03:54 PM   رقم المشاركة : 7
ثار التميميه
V.I.P مؤسس
 الصورة الرمزية ثار التميميه





معلومات إضافية
  النقاط : 20
  الحالة :ثار التميميه غير متواجد حالياً

 

افتراضي


اقتباس:
و من كبرها اذا جيت اباخذ المجلة اللي في مخبات الكرسي اللي قدامي لازم اقوم و امشي حول كيلو الين أوصل لها
علينا يامناحي؟؟

اذا كيلو الطياره كم حجمها

خخخخخخخخخخخخخخخخخخخخخخخ

عالاقل انت ازين مننا

اذا جينا نسافر امي وابوي لازم يقعدون اولى ويحشرونا سياحي

لين لقيت لهم حل الا وهو اني اقعد بالطياره اخر من ينزل انا

حتى مره من المرات واحد من المضيفين قالي وش تنتظرين انزلي

خخخخخخخخخخخخ تفشلت يومها

بس من بعدها صارو ياخذوني اولى






توقيع ثار التميميه
 
  رد مع اقتباس
قديم 17-01-2006, 11:52 AM   رقم المشاركة : 8
ذيب السنافي




معلومات إضافية
  النقاط :
  الحالة :

 

افتراضي


الله

الله

أقول أسبرانزا الدعوى فله أنا ودي أروح مصر بعد الأختبارات آخذ لي نقاهه وش رايك ؟؟

بس تراني عزابي مايصلح لي السفر ولا وش رايك أقضب أرضي أزين؟؟؟

بس والله ماشاء الله عليك تمشي وتصور مايستغربون أهل البلد ولا مضيفين الطياره من تصويرك أربع وعشرين ساعه







توقيع ذيب السنافي
 
  رد مع اقتباس
قديم 17-01-2006, 12:41 PM   رقم المشاركة : 9
ابو ياسر




معلومات إضافية
  النقاط :
  الحالة :

 

افتراضي


ثار التميميه

منهو مناحى هذا اللي انت تكلمينة

بعدين اذا انتي ما عمرك ركبتي طيارة طولها كيلو فهذا ما يعني اني انا ما ركبتها

شكلك والله غاثتن اهلك اللي جادعينك في السياحية و هم طالعين في الاولي.

ورا ما تكتبين موضوع عن ذكرياتك عشان نعرف السبب

مشكوره على مداخلتك الجميلة في الموضوع يا مناحيه (يعني اخت مناحي)



ذيب السنافي

تبي الصراحه يا الذيب انا يبي لي سفره معك.

والله انك وسيع صدر و تؤنس ، و انا في السفر جدي اكثر من الازم ، بكذا نلتقي في نصف الطريق.

شف مصر ونيسه و اهلها ونيسين بس ما كانت اللي في البال بالنسبة لي.

يعطيك ربي العافية و مشكور على المشاركة الكريمة


لك اجمل تحية







توقيع ابو ياسر
 
  رد مع اقتباس
قديم 17-01-2006, 12:51 PM   رقم المشاركة : 10
ابو ياسر




معلومات إضافية
  النقاط :
  الحالة :

 

افتراضي


اسبرانزا و معركة القاهرة


- الجزء الثاني -


بعد ما انتهيت من تصوير المناطق المحيطة بالفندق من بلكونة غرفتي ، لقطت جوالي السعودي و دقيت على محمد الحوت على الرقم (0020105206096) ، طبعاً بتقولون منهو محمد الحوت ، هذاعطاني رقمه واحد من الشباب و قال لي انه عنده مكتب و يأجر سيارات بسواقيها باليومية.


و فيما يلي الحوار اللي دار بيني و بين الحوت:

اسبرانزا: السلام عليكم ، الأخ محمد الحوت.
الحوت: وعليكم السلام ،، ايوه يا باشاء مين معاي.
اسبرانزا: معاك اسبرانزا من السعودية ،، انا الان في فندق الكونراد و عاوز لي سيارة بسواقها ، عاوز السيارة تكون حلوه و جديدة و السواق يكون ممتاز.
الحوت: دنتا تامر يا باشاء ،، انتا عاوز السيارة تكون قديده يعني موديل 2005.
اسبرانزا: ايوه يا حوت انا عاوزها قديده ،، موديل 2005 بيكون كويس.
الحوت: طيب يا باشاء انا عندي السيارات ديت:

تويوتا كورولا بسعر 250 جنية
متسوبيشي لانسر بسعر 250 جنية
كيا نوقيرا بسعر 200 جنية
دايو بسعر 180 جنية


هاه انتا عاوز أي وحده.
اسبرانزا: يا حوت سياراتك صغيرة ما فيش سيارات اكبر و احسن من كدا.
الحوت: فيه يا باشاء عندي ابو عيون قريئة بس موديلها 2003 بسعر 550.
اسبرانزا: ابو عيون قريئة ؟ وشي ذي.
الحوت : يعني مرسيدس 200 ، اية مالك يا باشاء مش عارفها.
اسبرانزا: طيب الاسعار هذي نهاية يا حوت.
الحوت: أي والله يا باشاء مش ممكن تيقي باقل من كذا.
اسبرانزا: طيب خليني افكر في الموضوع و ارد عليك.
الحوت: اوكي يا باشاء انا في انتظار.

بعد ما خلصت مكالمتي مع الحوت ، و خوفاً من انه يكون رافع على الاسعار دقيت على جوال وحده تشتغل في مكتب الطيار للسفر و السياحة في القاهرة (كان معطيني رقمها واحد من الشباب و قال لي اشيك على اسعار السيارات عندهم يمكن تكون زينة).

قالت لي حقت المكتب ان سعر الكورولا بالسواق عندهم بمبلغ 110 دولار في اليوم.
يوم عطتني السعر هذا رجعت و كلمت الحوت و طلبت منه يرسل لي الكورولا على الفندق على الساعة اربع العصر.
عند الساعة اربع العصر ولا سواق الكورولا يدق على من جواله دقة وحده و يقفل ، فدقيت عليه و قلت له اني انا و المعزبة نازلين الحين.


قبل ما اكمل الموضوع انا نسيت اقول لكم تفاصيل وقت الرحلة:

الطيارة اقلعت من الرياض الساعة 0800 ، بعد تأخير عشر دقاق
وصلنا للقاهرة الساعة 1030 ، يعني بعد ساعتين و نصف طياران.
طلعت من مطار القاهرة حدود الساعة 1100 دقيقة.
وصلت للفندق حدود الساعة 1230.
السواق جاني في الفندق الساعة 1600



الحين نعود للموضوع.

ركبت الكورولا و كانت الحقيقة نظيفة و جديدة و السواق كان في حدود 45 سنة و كان جداً محترم و مهذب و اكتشفت بعدين انه سواق ممتاز. (اللي يبي رقم تلفون السواق يرسل لي على الخاص ، بس تراه مشغول الين نهاية شهر 8 ميلادي من السنة هذي).





هذي صورت الكورولا و يظهر فيها السواق ، الصورة هذي اخذتها من احد الشوارع الفرعية لشارع جامعة الدول العربية بعد كم يوم من وصولي للقاهرة.


طلبت من السواق اللي كان اسمة (علي) يودينا لم محل نتغدا فيه و يكون كويس ، سألني السواق عن نوع الاكل اللي ابية ، فقلت له لو اكل بحري يكون كويس.
اقترح السواق انه يوديني لم مطعم اسمة فش ماركت (Fish Market) ، و المعزبة أيدته لانها تقول انها راحت للمطعم من قبل مع أهلها في سفرات سابقة للقاهرة.

رحنا للمطعم و اللي كان موجود على مركب بحري ثابت أسمة مركب اميريكانا (Americana) ، المطعم كان موجود في اعلى دور من المركب ، وكان في المركب مجموعة من المطاعم مثل تشليزي و فرايديز.

دخلنا المطعم و قعدنا على طاولة تطل على النيل و طلبنا المنيو (قائمة الطعام) من الجرسون ، فقال النا انه لازم نروح نختار نوع المأكولات البحرية اللي نبغاها من عند ما يشبة الكاونتر الكبير اللي مليان ماكولات بحرية طازجة.





هذي صوره للمطعم من جوا.






و هذي صورت المأكولات البحرية الطازجة على الكاونتر.



انا يوم شفت الربيان حقهم و تبدا سعابيلي تقاطر ، ياهو ربيانهم كان كبير و ياخذ العقل من زينة ، قلت للي على الكاونتر ياخذ لي نصف كيلو من الربيان و يقلي نصفه و يشوي النصف الثاني ، وأخذت بعد قطعت هامور و قلت لهم يقلونها.

رجعت انا و المعزبة و قعدنا على الطاولة فيما يطبخون الربيان و الهامور ، شوي ولا الجرسون جايب معه صينية كبيره عليها 8 صحون صغيره كل صحن فيه نوع مختلف من السلطة و المقبلات.

اخذت صحن ثومية و صحن حمص و صحن فتوش.
طلبت لي انا و المعزبة ببسي ، و بعدين جا الربيان ، و خذ اكل الين طلعت عيوني.

بعد ما شبعت انا و المعزبة طلبت الحساب ، و انا حاط في بالي ان السعر بيكون ظربة من كثر ما اكلنا من الربيان و السمك و السلطات (الثومية كانت زينة مع الربيان فطلبت منها صحن ثاني) ، جاب لي الجرسون الحساب ولاه مع الخدمة فقط 190 جنية (حوالي 125 ريال) ، يا بلاش.





هذي صورت الفاتورة.



المطعم بصفة عامة كان زين و نظيف و طبخهم كان جداً ممتاز.

بعد ما خلصنا من المطعم و ننزل لم كافية اسمه القراند كافية (Grand Cafe) و كان موجود في الدور الأرضي للمركب عند المدخل.

طلبت من الجرسون شيشة تفاح باشاء ، فقال لي انه ماعندهم الا تفاح بحريني ، فقلت العوض ولا القطيعة هات التفاح البحريني.
و يا ليتني ما طلبت شيشتهم ، كانت تنسم من كل جهه ، والراس يفشل من صغره ، والله ان الريال السعودي المعدني اكبر منه.

ناديت على حق الشيشة عشان يشوف لي حل مع التنسيم اللي من عند مدخل الهوز في الشيشة ، قام حلها يقالك بانه جاب قطعت ورقة ثانية و لفها على مكان التنسيم.





هذا راعي الشيشة الصعيدي يضحك يوم قلت له ان الشيشة مثل خشتك.



بس في النهائة راس الشيشة كان بس 5 جنية ( 3 ريال) ، لكن فيه نقطه ما اخذت بالي منه يوم دخلت الكافية ، الحد الادنا من الطلبات 25 جنية للشخص ، الا اذا كنت ماكل في الفش ماركت ، انا ما اخذت الفاتورة من المطعم معي ولا كنت مستعد اروح للمطعم عشان يعطوني اياها علشان 50 جنية ( ترا الريال حوالي 1.5 جنية ، انتم عاد احسبو كم طلعت بالريال) ، لكن ما خليت لهم الدراهم لاني خليت المعزبة تطلب لها ايسكريم و ببسي و موية ، فكملت الـ 50 جنية.

بعد ما طلعت من الكافية قلت للسواق يوديني للفندق عشان نريح شوي ، و طلبت منه يرجع لنا على الساعة 11 بالليل.

وصلت للفندق على الساعة 8 مساً ولا الشمس توها باديه تغرب ( الشمس ما تغرب في القاهرة الا حدود الساعة 8:30 بالليل).

طلعت لم بلكونت غرفتي مره ثانية عشان اخذ صور مع غروب الشمس.






هذي صوره للمنطقة الموجودة خلف الفندق مع غروب الشمس.






و هذي من إمام الفندق لكورنيش النيل و النيل و جزء من القعدة الموجودة في الدور الثالث للفندق.






هذا مسبح الفندق في الدور الثالث من الفندق.


و انا في البلكونة و قاعد اخذ الصور اللي فوق جتني المعزبة و معها في يدها ربع جنية و قالت لي انها فازت به ، انا استغربت و سألتها وشلون فزتي بالربع جنية فقالت لي انها حبت تاكل من بطاطس اسمه شبسي كان فوق الثلاجة في الغرفة ، فيوم فتحت الكيس حق البطاطس طلع لها الربع جنية هذا.
طبعاً الشي اللي ما تدري عنه المعزبة ان سعر كيس البطاطس هذا اللي ما يسوا نصف جنية هو 20 جنية في الفندق ، لكن ما قلت شي للمعزبة عشان ما أضيق صدرها و قلت لها انها مبروكة و محضوضة اللي فازت بالربع جنية هذا.





هذي صورت الربع جنية اللي فازت به المعزبة و كلفني 20 جنية.

طلعت للبلكونة مره ثانية و اخذت كم صوره إضافية للمنطقة بعد ما غربت الشمس.





هذي الجلسات الموجودة في الدور الثالث من الفندق.






و هذي صوره لكورنيش النيل و النيل.


انا الحقيقة أعجبتني الجلسات الموجودة على الدور الثالث ، فقلت للمعزبة ور ما ننزل و نجلس فيها الين ما يجي السواق.
قالت لي المعزبة خلاص انت انزل و انا بلحقك بعد شوي.

توكلت على الله و نزلت للدور الثالث من الفندق ، و رحت للجلسات و كانت احلي من ما توقعت و بالذات الجلسات العربية منها.
جلست و طلبت لي راس شيشة ( طبعاً ما عندهم باشاء فخذت تفاح مدري وشو) ، و انا جالس امزمز في الراس ولا شلت ذيك البنات ( 6 بنات ) مقبلات و جلسو في الجلسة اللي جمبي ، طبعاً البنات لا حجاب ولا يحزنوون و مغير بناطلين جنز من القصار (البرمودات) و بلوزات ضيقات وثنتين من البنات اللهم يا كافي كانت بلوزاتهم قصيرة و بطونهم طالعة (لا يطلع لي احد و يقول انا وراني مطير عيوني فيهم و قدرت اعرف كل التفاصيل هذا عن ملابسهم ، ترا انا لي النظرة الأولي ، و كل هذا شفته في النظرة الأولي)

انا الحقيقة خفت على نفسي من البنات هذول اللي اعتقدت في البداية انهم مصريات (طلعو سعوديات لاني عرفت لهجتهم و كلامهم عن المدينة اللي هم منه في السعودية. و تراني ما قطيت اذني عليهم ، هم اللي كلامهم كان عالي و كله كركره و ضحك) ، فنا كنت واحد وسيم و حليوه و قاعد بلحالي ، زياده على كذا خفت ان المعزبة تجي و تشوفهم جالسين في الجلسة اللي جمبي و تطب في بطني ، ولا امداني اكمل تفكيري في الموضوع الا والمعزبة مقبلة ، انا في اللحظة هذي تصورت انها نهاية الدنيا و اني بروح في خرايطها.

المعزبة ما امداها تقبل على و تشوف البنات اللي جالسين في الجلسة اللي جمبي الا وكشرت عن انيابها (يا رب سترك يا رب).

يوم جت المعزبة عندي و تمسك يدي و تجرني و توديني لم جلسات ثانية بعيده عن البنات و هي اللي تقول لي "انا ما يمديني اتركك كم دقيقة الا و تشبك مع البنات" و خذ تهزئي ، انا طبعاً حاولت ادافع عن نفسي بس من وين ادافع ، عمركم وقفتو تريلة بسيكل ، هذا كان وضعي.





الصوره هذي اخذتها لمبني الفندق و انا جالس في جلسات الدور الثالث.

يوم جت الساعة 11 بالليل ولا السوق يدق على و يقول لي انه عند باب الفندق ، نزلت له انا و المعزبة و طلبت من السواق انه يوديني لم مركب على النيل مدحه لي واحد من الشباب و يقول ان جلساته بالليل حلوه ، المركب اسمة بلو نيل (Blue Nile) ، وصلنا للمركب و طلعنا على اعلى دور فيه (سطح المركب) و كان فيه مطعم لبناني اسمة رويل قراند كافي (Royal Grand Café) ، المركب كان حليوه و فخم الحقيقة ، بس المشكلة ان المكان كان زحمة و انا ما كان عندي حجز ، فحطوني على طاولة صغيرة في الممر ، و كل ما جاء واحد بيعدي لازم يصدم فيني.







هذي صور المركب من الخارج ، واعتذر لكم عن ردات الصور ، بس كانت يدي لين الحين ترتجف عقب التهزيه اللي جتني من المعزبة.( وترا الصور اختها في زياره لاحقة للمركب بعد كم يوم بالليل)

طلبت لي شيشة تفاح بحريني و ببسي لي انا و المعزبة ، وقعدت حدود نصف ساعة بعدين طلعت من المركب ، الجلسة في المطعم اللبناني كانت زينة و المكان فخم و زين و كان فيه وحده تغني صوتها كان جداً جميل ، بس لاني ما عندي حجز حطوني في محل مهوب زين.

انا عاد قبل ما اطلع من المحل اخذت رقم جوال مدير المطعم عشان اذا جيتهم المرة الثانية اسوي لي حجز ، و هذا رقم جوال مدير المطعم جمال (0020101697997).

يوم ركبت السيارة طلبت من السواق يوديني لم مكان ثاني يكون كويس ولا هو بعيد عن المنطقة لان الوقت تأخر، وداني السواق لم مطعم على النيل اسمة هابي دولفن (Happy Dolphin) ، دخلت للمطعم اللي كان على شكل خيمة كبيرة بدون جوانب ، ولا المكان من جد مزحوم و فيه عوائل كثيرة و معها بزران كثر التراب ، المكان كان عائلي بحت. و اغلب اللي فيه كانو سعودين او خليجين.

قعدت ادور في المطعم و ادور لي على طاولة فاضيه ( ما كان عند مدخل المطعم احد يجلس الناس) و انا ادور على طاولة جاني واحد يشتغل في المطعم و سألني اذا كنت ادور على طاولة ، فقلت له اية و جلسني على طاولة أرضيتها مفروشة بالسجاد و قال لي هذا المكان الوحيد المتوفر و ترا ما يقدم شيش في منطقة الطاولة بسبب السجاد، انا اضطررت اقعد على الطاولة هذي الين تفضاء احد الطاولات الثانية ، انتظرت حدود 10 دقايق ولا فضاء شي من الطاولات اللي تطل على النيل ، يوم مر من عندي احد موظفي المطعم سحبته من يده و قلت له يدبر لي طاولة و اني ابكرمة على الشي هذا ، رد على الموظف و قال عيب يا باش انا مدير المطعم و مش عاوز حاجة ، وقال لي عن احد الطاولات اللي تطل على النيل و بلغني ان اللي جالسين علية دفعو الحساب و انه اول ما يقومون لازم القط المعزبة و اركض بها للطاولة قبل ما يجلس عليها احد ثاني.
انا طبعاً تعجبت من كلام مدير المطعم بس قلت لنفسي اني في مصر و مفروض اني ما استغرب.

المهم انا ركزت نظري على الطاولة اللي مفروض اصحابها يقومون و فسرت عن ذرعاني و قلت للمعزبة تفصخ الكعب اللي هي لابسته و اول ما يقومون اللي على الطاولة تروح معي طيران للطاولة قبل ما يأخذها احد.
راحت دقيقتين بعدين 5 دقايق و بعدين 10 دقايق و اللي على الطاولة ما قامو.

انا قفلت معي و قمت رحت الهم عند طاولتهم و وقفت فوق رؤوسهم الين قامو و تركو لي الطاولة.
تراني والله اني ماني عربجي ولا راعي مشاكل ، بس للحاجة اسبابها.

جاني الجرسون للطاولة و إعطاني قائمة الطعام ، فطلبت لي كباب و كفتة بتلو (انا ما اكل لحم الغنم و الضاني ، هذا ليه انا محروم من المشويان في السعودية) مع صحن ثومية و ببسي و شيشة و المعزبة طلبت ورق عنب بالكوارع و فته.

قعدنا في المطعم حدود ساعتين و كان حساب الأكل مع الشيشة (ترا الشيشة يجي معها راسين بسعر 8 جنية للاثنين) حدود 160 جنية.

المكان بصفة عامة حلو و بالذات للعوايل لان فيه وز وبط على النيل عند المطعم و فيه مركب بحري يطلع في جولة على النيل لمدت نصف ساعة كل ساعة بسعر 5 جنية للشخص.
بالإضافة الي ان جلساته حليوه ولا باس بها.

و اعتذر منكم عن عدم توفر صور للهابي دولفين ، بس انا الحقيقة نسيت اصور المحل.

بعد ما طلعت من المطعم رجعت للفندق حدود الساعة 2 الصبح و حطيت راسي و نمت.

هذا نهاية الجزء الثاني من الموضوع و قبل ما انهيه تراني ما أنصحكم تأكلون كفته و كباب في المطعم هذا ، و السبب بقوله لكم في الجزء الثالث من الموضوع.






توقيع ابو ياسر
 
  رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 10:00 AM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لمنتديات الفطاحلة