الجهات اربع

[الطائر المهاجر]

الجهات اربع بكونٍ ما ابدعه= خلقة المعبود في خلقه حكيم
والجسم باطرافه اللي تتبعه = اربعه .. من دبرة الحي الكريم
والقصر باركانه اللي ترفعه= لو هزع واحد سقط كله هشيم
وفي تميم الفخر اركان اربعه= من بيوت المجد من عهدٍ قديم
الجسد واحد اذا حس وجعه = تشتكي الأعضاء من هول الحميم
غير عضوٍ يختفي في اقنعه= ما يحس اللي وطى غيره لئيم
رافعٍ خشمه على غير سنعه = وشايفٍ غيره رعاعٍ أو خميم
اطغته دنياه باللي يجمعه= أو بمنصب بعد ذلّه وتعظيم
ينتمي بالإسم ما به منفعه = ولا نخشه السيل نادى "ياتميم"
مثل هذا ودك انك تلفعه = انتمائه عار للقصر العظيم
فالرجل بالذكر واللي يزرعه= من فعال الطيب من قلبٍ سليم
ومن تواضع فالله اللي يرفعه= ومن تكبّر فالنهاية بالجحيم