[الطائر المهاجر]

يقولون ولد الأصل يزكي عن الردى = ولو بان عيبٍ منه يرجع لاصوله
مفاهيم سادت وانتهت لو لها صدى = على ايام كلٍ حاسبٍ وش يقوله
يخاف الملامه من رجاجيل تنقدا = واذا طاح في الغلطه نفته الحموله
ومشينا على ماقيل ما ندرك المدى = لوقتٍ يغيّر في سمات الرجوله
فلا من رقيبٍ دام هالمجتمع غدا = خليطٍ جلب كل الردي مع وصوله
يعلم شباب اليوم من كل مشهدا = لعادات فيها الذلٍ لاجل السيوله
يجي لك وليد الأصل لا صرت مقصدا = يذكّرك في جدّك وعمّ ومخوله
ولو يجتمع في نوح معكم تنهّدا = بدا ينتخي بك دون عينٍ خجوله
خطيرٍ الى رجليك يركع ويسجدا = يبي حاجته تقضى بيسر وسهوله
واذا من قضى لازمه تلقاه يجحدا= يجيك الخبر عن غيبته والنذوله
تعلّمت من دنياي ما احكم على حدا = بقالوا وقلنا دون علم ودلوله
فكم من اصيلٍ كان للنار موقدا = كريمٍ شجاعٍ كل طيب يطوله
يخلّف لنا بومٍ علينا ينكّدا = يشوّه نعيقه ما بقى من فصوله
وكم من رجل نجهل اصوله ويحمدا= على ما نشوفه من فعال البطوله
فخلّك من اصلٍ صاحبه عنه مبعدا= وفتّش عن اللي يعجبك في فعوله