[كريمة محمد]

صوت يناديني على تالي الليل = صوت الضمير وهاجسي شاغلني
قامت تطارد داخلي كنها الخيل = وتلهب حشاي بنارها ما تحني
كلما غفيت آفز لو واهن الحيل = حلم تكرر هالني وامتحني
اشوف قدامي فدام ورجاجيل = باوضاع ما توصف بشعر وفني
الراس تحت وواطي فوقه الذيل = والجو كتمه والعقل في تدني
والكل في الوادي ولا ثمن السيل= وصوتي يلعل والصدى به يرني
محد سمعني ومن سمع قال ذا خبيل= خلك بنفسك واحسن بكل ظني
وان كان ما تصبر فدن المعاميل = واقلع مثل غيرك ترى ترجهني
ولا من حضرت لمجلس فيه تطبيل= طبل معاهم وان قدرتَ تغني
ولا من لقيتَ اللي يحدّث بتهويل= حدّث معه واخشع بصوت يحني
هذا هو الحاصل بوقت التماثيل = فاللي يمثل ما يعوقه تمني
وقمت اتفكر في رجال اراذيل = ووشلون وصلوا دون ادنى تعني
تغسل رويسك لين ما ينتهي الليل= وفي الصبح تركض في سلامك تهني
ومن قابلك حبّه وراسك بتمييل= واضبط كلامك في خضوع وتدني
ياسرع ما تذكر وتطمر ولو فيل= وكل الذيابه تحت خفك توني
يالعنبو هالحلم كله تهاويل = اشوى اني بنومي ولاذا بكني

[/QUOTE]

قصيدة بالفعل لا تحتاج الى تعليق تسلم لنا اناملك استاذنا ومشرفنا اتمنى لك مزيد من الابداعات القادمة