لو تصدق الامثال في كل الاحيان= كان العرب اذكى البشر بالفطانه
قالوا الفتى لازاد هرجه بنقصان= ولو هو صحيحٍ فكل اطرم تكانه
وقالوا ترى الجدران تسمع لها آذان=واقول ما تمشي على اهل الذهانه
فكلمتك دامت عن دليلٍ وبرهان = يهاب منها من فقد لاتزانه
اصدع بكلمة حق لاتخاف انسان= تكسب رضا الرحمن باعلا مكانه
لكن بعقل وكل كلمه بميزان = واسلوب راقي دون سب واهانه
ولا يخدعك شكل الرجل ويش ماكان= حتى ولو تدري بعرقه متانه
ولو كان في منصب عليّ وذو شان= تلقاه طبلٍ واصلٍ بالمهانه
وحوله حصاني لابسه كل الالوان= تملي عليه ولا درى ويش شانه
كلما يخطه بالقلم كل الاحيان= "اكمال لازم" واكملي ياجمانه
شهادته تزوير تشرى بالاثمان= والمخ فاضي لو يلفّ بلسانه
فالشمس ما تحجب بغربال لو زان= والفعل يكشف من يخون الأمانه
هذا زمان اللي يبيعون الاوطان = من كل اناني غارقٍ ف الخيانه
ولو وصل بالصندوق زورٍ وبهتان= عن انتخابٍ فاسدٍ في كيانه
مثل اللذي في مصر اوصل للاخوان= للحكم بعد السجن ذاقوا هوانه
واعطاهم الضوء الخضر دون كتمان= بقتل المعارض والحكم في رعانه
ويعطوه ما يبغى من الدار الاركان= ومعها العهود الثابته والضمانه
خراب مصر وربطها الجسر بايران= لتنفيذ مايبغون بارض الكنانه
وشرقٍ جديد واضح لكل الاعيان = يقسّم بلاد العرب في كل خانه
خطه خطيره من وضع ربع ديان= وتنفيذ امريكي بخبث ولعانه
اخرج سجينٍ مطارد لعدة ازمان= يخضع لأمرك دام نال الحصانه
يرتد عن مبداه مادام شفقان = على الحكم والمال بعد الإهانه
ومادام له اتباع في عدة اوطان=وشعب العرب يخدع بأهل الديانه
تضمن بهم تنفيذ خطتك باتقان= تحت ستار الدين تكسب رهانه
وتثير فوضى من اليمن لين تطوان=باسم الربيع ابلا احتجاج وادانه
تصرّف بها سلاحٍ وتقبض للاثمان=وتسيطر على الثروه وتعطي اعانه
وترجّع العربان للمعز والضان= وتهدم حضاراتٍ بنوها برزانه
تسهّل لإسرائيل واتباع ايران=حكم العرب في كل يسر وليانه
تنفيذ لعهودٍ قديمات الازمان= بين اليهود وبين فارس مصانه
يالله عليك بمن ركب دينه حصان= من شان جيبه لو يخون الأمانه