[الطائر المهاجر]

تأخرتي عليّ وزاد شوقي = ابصبر بسّ مالي مقدريّه
مع الأيام يتعبني خفوقي = يجرّ الصوت بجروح نديّه
ينادي لك بإحساسٍ صدوقي= تعالي وانظري حالي رديّه
اسابيع مضت زادت حروقي= احس بها سنه واكثر شويّه
شراعي تاه والأمواج فوقي = بغبّ الليل لافجر وهويّه
افتش عنك واثرك في عروقي= مع النبضات في عمق الخليّه
ورحتي بعيد لا رعد وبروقي = سحابة صيف وعروقي ظميّه
توحّد بي هواجيسٍ تعوقي = جيوش الياس من حولي قويّه
ولا تدرين عن خافي عموقي= سليتني بعد كنتي الوفيّه
يدك في بارد الماء الدفوقي = ويدي بالنار تحرقها اللضيّه
اذا الفرقى على كيفك تروقي = تراها قتل عمدٍ للضحيّه
كفاني ماجرى جفت عروقي= تعبت امشي وقيدك في يديّه
انا المسجون في سجن الرموق= اخاف السجن ما يصبر عليّه
واخاف الليل والنجم السروقي= اذا طالعت يخطفني عشيّه
وانا اللي ما دخل احدٍ بذوقي = سوى اللي علمتني الجاذبيّه
ايا ريح الصبا احمل لشوقي = معك اجمل سلامي والتحيّه
صباح الخير يا نبض الخفوقي= ترفق بي ترى بُعدك خطيّه