[الطائر المهاجر]

انصحك يا ابني خل قلبك وميله= ما ينبنى بيت على واهي الساس
لا تاخذ الا بنت حرٍ اصيله = معدن ذهب ما خالطه صفر ونحاس
تسند بعلها لا انتهى وضعف حيله = واصبح عويدٍ يشكي امراض واتعاس
ولا تنخدع باسم الاهل والقبيله = ترى العرق للعرق لاشك دساس
كم من عوايل للقبيله دخيله = والاصل مجهول فلا عنه ارماس
وحاذر من اللي من نفوس ثقيله= عنيدة والكذب من كل الاجناس
لا عيلت تقلب بيوم وليله = وتصير لبوه دوم للشر مقباس
تبي تجرك مثل تيسٍ بذيله = والا تعنفص مثل عجله بالامراس
ولا تقول ذي زينه وهذي جميله = الزين بالاخلاق مع صدق الاحساس
وحاذر من اللي تشبكك بالف حيله = تقول احبك انت من بدة الناس
تظهر لك انها بالمشاعر نبيله = تحاول لصيدك ما تعود بالافلاس
ويومك تتبعها تشوف الفشيله = وتكشف امور خافيه دون هوجاس
فالأم لامن صار تمشي الرذيله = تنتج بنات مثلها بكل الادناس
يتعلمن منها الحيل والختيله = وصيدة رهيف القلب من دون حراس
حراس من دين بعقلٍ يشيله = تحميه من دربٍ به الكيف والكاس
حنا بوقتٍ ما بقى به فضيله= كلٍ يبيع ويشتري دون مقياس
بعضٍ يبيع الدين والعرض ليله = وبالصبح متطرف بهرجه والاوجاس