ياقلب طاوعتك على غير قادي=ارجع عن الصبوة ترا ما انت مسموح
شمتت في الاصدقاء والأعادي=واتعبت رجليني على غير مصلوح
قال انت في هالعلم وين انت غادي=كم لي وانا اعاني من الوجد مجروح
متى سلمت من الأرق والسهاد=وتقلبك كنك على المل مسدوح
قلت استقم واسلك سبيل الرشاد=وارتاح مالك والغرابيل والنوح
عشرين عام اتهيم مع كل وادي=وتون لو ناحت حمامة على الدوح
قال انت وش علمك علي امتحادي=شف عينك اللي دمعها دوم مسفوح
دايم قشرها للمخاليق بادي=وهمي خفي والا شقا العين مفضوح
قلت بسببك اللي نسيته يعاد=ويطري عليك اللي من سنين ممسوح
وملفا الهموم المرمسه والجداد=ودايم وبابك للهواجيس مفتوح
وارهقتني في كثرة الاجتلاد=لو جيت منه اليوم له باكر اتروح
قال امعصي ما اوحي صياح المنادي=رأي يقول انسه وجز عنه مطروح
عما تبي وابيه حاديك حادي=اللي حدا الشعار للسهر والبوح
مبني على حبه نسيج الفؤاد=ومسمر ٍ تسمير لوح ٍعلى لوح
يبيض من ريش الغراب السواد=والا الجسد يوم يتبرأ من الروح
ما انساه حتى انسى شرابي وزادي=وانسى عيالي واترك الدار واروح
قلت آتمنى يوم احصلك هادي=واشرح لك الموضوع والوضع بوضوح
ان كان لك عقل ٍحصيف وسداد=ذكي يميز بين راجح ومرجوح
احذر تغرك جلستك بالبراد=ونضم القوافي جد مرات ومزوح
يكفيك نكبات وعذاب ونكاد=عن كل تعليم ودراسات واشروح