ترى ماهو صحيح إنّي افكر لازمٍ موجود = فانا موجود في عالم يبي فكري بتغريبه
يبيني جسم لا روحٍ وتفكيري عليه قيود = فلا افكّر ولا اتكلّم ولا اناقش عذاريبه
خلقنا الله وميّزنا بعقلٍ ما خلقنا قرود = فمن حقّك ومن حقّي نفكّر دون ترهيبه
بلا تفكير ما نلحق خلايق وضعها بصعود= والى من حجز تفكير الفتى ماتت مواهيبه
ومن حقك تكلّم ما تبي بالنقص والا الزود= ولكن في حدود العقل ما نقرب من الريبه
ولكن هالزمن محتاس ما ندري وش المقصود= فكلّش لاتقرّب له سوى في مدح ترتيبه
لهذا لا تفكّر واحفظ لسانك ولو مكمود= من اللي دايم تشوفه بوقتٍ واضحٍ عيبه
اذا تبغى تعيش الوقت خل العقل ما به فود = ودرب الراس مثل الناس بكل الذل والطيبه
تكبّر راس من شفته ولو هو من بقايا هنود = ترى ياما توسط وافدٍ ما يوم تحري به
وراقب وين روس القوم تومي ركع وسجود = توجّه له وخلك ذرب في هرجٍ وترحيبه
تمسمس بالبشت وانظر ببسمه تفتح الموصود = ترى للبشت هالأيام فعله في مواجيبه
وجهّز كلمةٍ فيها الشكر والحمد للمعبود = ودعوه من لسانك يحفظه دايم ذرى وهيبه
وخلّ البيت مفتوحٍ تعزم العضد والمعضود = كأنك من كبار القوم في لبسه وفي طيبه
يجيك الحظ ما يبطي يطامر كنّه المطرود = غديت واثقٍ موثوق عند العضد وصحيبه
تلبّس ثوب لوك قاصرٍ يمغطك كالممهود = وتصير الخادم المخدوم في اعلا مناسيبه
يسود الجهل في وقتٍ غدا الصيّاد به مصيود= فلا التعليم به ينفع بلا "واو" تعلّي به
وهذا الوقت وقت الجاه وراع المال به معدود = ولايسأل عن المصدر ولو يدرا به نهيبه
قليل الفكر يسعى له ولوهو بالعقل جلمود = وفي لحظه يصير الشيخ ما تطرى عذاريبه
ولو واحد فشل منهم وراح السجن كالمعهود = طلع منّه بعد مده بصك اعسار في جيبه
ومن فكّر ولا غامر يعيش بفقره المعهود = فلا له قيمة في وقت صار القرش له هيبه
وانا المقرود مع حظٍ لفاني كنه المولود = طموح العلم لاغيره أراكض في عراقيبه
قضيت العمر في الغربه وجبت العلم بالمجهود= وجيت اركض احسب إني الاقي كل ترحيبه
ولكني مشيت بدرب ما يدري عن المفقود = ولا باللي يجوع ولا فقيرٍ فاضيٍ جيبه
فلا بيتٍ لي اسكن به ولا راتب يقيم العود = وزميلٍ صار بالعالي فرض (واوه) مطاليبه
وربع كنت انا اعرفهم رسوب ودز مثل طرود = غدو في عز ما احلم به ولو مع شيبتي شيبه
عرفت ان العقل نقمه بهذا الوقت ما به فود = وفهمت العلم ما ينفع بدون (الواو) لصحيبه
إذاً: ما اقول انا موجود دام إنّ الفكر مؤود = حرامٍ وقت ضيعته وعشت العمر تغريبه