الرجل لا من اجتهد مع عياله=في تربيه وتعليم مع حسن توجيه
ما يضمن ان البعض يطلع حثاله= يشوف منه افعال تخيب هقاويه
ولوهو تفكر بالأمر في عجاله = يلقى السبب من وقت بانت بلاويه
خرج لنا اجيال تحب النذاله= وتهوى التبطح والمطبل تخاويه
كبر الجسوم وعقلها كالنخاله = واكل المطاعم اكلها ما تخليه
لو وصل للخمسين لازال عاله=على الأهل كالطفل همه شهاويه
وانما حصل له ما يبي عن جهاله= قلب على اهله عدهم من اعاديه
واللا يجيهم بالمكر واحتياله= مديون والديّان ماهو مصافيه
انما يسدد فالسجن من مآله = وبالنصب ياخذ مايخطط ويبغيه
ويدير ظهره بعدها في سهاله=ولا هوب ناشد عن عجوزه ولا ابيه
هذي صور من مجتمع بان حاله= بعصر الحضاره مادرى عن مباديه
حضارةٍ استوردت للزباله = مما يعاني الغرب لوهو بتعليه
حضارة الدولار باقذر وباله = قضت على الانسان باجمل معانيه