ماضاق صدر الكون لو ضاق صدري=ولاتغير شي في سير الاقدار
اضيق واكتم ضيقة النفس وادري=ان الصبُر زينه لقلب ابن منشار
ماملّ بي بين البشر يوم صبري=ولاشكى قلبي طويلات الاسفار
اسري مع الهاجوس من حب فطري=ماهوب للشهره ولا لفت الانظار
ساعه مع المسحوب واحيان حدري=وارتاح بين الناس من راع الاشعار
والي نوى بين المخاليق غدري = حسبي عليه الي عليمٍ بالاسرار
اهل الخيانه والحسد فوق جمري=يتقلبون ومايفيدن الاعذر
جمر القرض واحيان من جمر سمري=من واهجه يشوي وجوه اهل الاشبار
دنيا بها الصاحب ندر والمسمري = يختال فوق اديمها يشعل النار
غاب الصديق الصادق وبان فجري=بين الوجوه الكالحه واهل الاعذار
كلن تقوقع حول نفسه ويجري =يلهث ورى الدنيا وينقر بمنقار
ياكل حقوق الناس رشوه وقسري=واليا نصحته قال ماعندك افكار
خان الامانه واشترى فكر عبري=اغنم زمانك رايته دوم مكار
ماخاف من رب السماء دوم يفري=يسعى ورى اللذات وله الف مسبار
وانا احمد الله دوم للخير فكري = دنيا صغيره دوبها تروي المار
خذيت منها الي ابي قبل قبري=واخترت دربي فوقها بين الاخيار
مالي بها الا مامضى لي بعمري=بيض الصفاح ايامها واكرم الجار
راضي بقسمي للغناه او بفقري=على النقاء معروف في كل الاقطار
ماغرني فيها غناء وهز خصري=ولاتبعت افكار عشاق الامصار
على النقى ماجيت في يوم ندري=ماشي على درب الصحابه والانصار
ماهمني حاسد ولاقول مكري =اخذ جميل الطيب من كل عطار
والي يقابلني على الطيب يطري=مايجني الا الطيب في كل محضار
والي يعاديني يجيه الف حضري=ان تاب والا ماله الا لظى حار
اهوى جمال الروح من حب عذري=ماتقبل الشينه نفوسن لها كار
يمشي الجمل بالدرب والي يهذري=مايجني الا من هذاريه الامرار
هذا كلام الصدق لاضاق صدري = قول الصحيح الي بقلب ابن منشار