لك الله يا الزمان اللي تدوس المسلمين خطاه = يمرّ العام والثاني ونشكي جاير سنينه
قهر في قهر مما تنشر الأخبار او نقراه = مشاهد دوم تتكرر توضح وضع ناسينه
تناوشنا بغاث الطير من بومه وحتى حـداه = وإذا طـاح الجمل لا بد ما تكثر سكاكينه
بطش فينا المعادي ما يبي قلبٍ يقـول اللـه = يبي الطاغوت يحكم به وجبتٍ من قوانينه
شبابٍ كل يوم ينقتل محدٍ سأل معناه= ضمير مات في عصرٍ شربنا المر من شينه
فهل من يدفع العدوان عن نفسه ومن بحماه = يعامل مجرم ويقتل ولاحدٍ قال ذا وينه
سكتنا عن فلسطين وبدا العادي ومن والاه = بجريمه ثانيه كبرى بعونٍ من موالينه
واذا من قاومه حرٍّ يحس الذل في دنياه = فهو لاشك ارهابي ولا يحتاج تخمينه
حلالٍ قتل شعب كاملٍ قاومه في احياه = وحرامٍ قتل جنديٍ مجرمٍ أواخذه رهينه
غدينا ننتفض كلٍ يبي العادي وكسب رضاه = جسد لو طعن في قلبه فلا تدري شرايينه
تبنـى المذهب النكرة صليب ونجمة ويـّاه = جمع حقـد النصارى واليهود بكل تدوينه
يقـول بدينكم ارهـاب لازم نبتدي نمحـاه = نعـدّل في أحاديثه وآياتـه وتضمينه
ندرسكم حضـاره وارد الإنجيـل والتـوراه = فشعب الضـّاد متكبّر نبي هصره وتليينه
لأنه عارفٍ سرّه ويدري قـوّةٍ تحداه = إذا من هـلّل المليـار ما قاوم براكينه
تهمنا حقد بالإرهاب وهو من طوره واعطاه = لمن يخدمه في العالم يمدد به جناحينه
تهم ما تنتهي حتى بقولة آه وا ويلاه = بغابه ما بها قانون يحمي الحق ويعينـه
لقانا ضعف قدّامه ، فرسنـا وداسنـا بحذاه = تنـكّر للحقـوق اللي يطبقها بدواوينه
يبي يشرب دم المسلم وعظمه لو قـدر يلحاه = يبي الكعبـه على خيبـر تدنسها كلابينه
مثل ما نجس الأقصى ولا أحـدٍ قـادرٍ يحماه = وقتله من بغـى منا وتشريده وتسجينه
خذانا للحضيض المرّ من فعله ومن شــرواه = وثبّتنـا على دربه وما يرضي محبينه
يعرف انا كما البركان خـامد دون دين الله = من التـاريخ يدري به ولا تجهله حطينه
تـرانا ما انتهينـا ثعلب الغـابه ولا تحـراه = ترانا كالنخـل يحيـا ولو حاولت تدفينه
وترانا لا ناخانا الـدّين بعنـا العمر به نفــداه = تبي الدنيـا وحنّـا نطلب الجنـة وشارينه
تـرانا ما فتحنـا الأرض للعـزه ولا للجـاه = ولكن كي يسود العـدل من غربه إلى صينه
ولا حنّـا فتحنـاها بصاروخٍ خطا مرمـاه = فتحنـاها بكلمة حق تعطي الحق وتزينه
وحنّـا من عطاك العلم يومك جـاهلٍ معنـاه = قواميسك وراجعهـا وتدري عن براهينه
مـدام إن الزمن دوّار عطاك السبق في مثنـاه = لزومٍ يوم يتخلّى ولا تحكـم قوانينه
مخططكم ترى واضـح تبيّن للملا مغزاه = تبون الدين مع ثرواتنا ندري ومحرينه
ترى التمثيل مكشوفٍ ودربك واضحٍ مسراه = وندري باقتصادك دوننا ينهار في حينه
واذا منك خدعت البعض يمشي خايف الإكـراه = ترى كل الشعوب بكرهكم تجمع ومحصينه
وحتى من وثق فيكم وغير شئ من مبداه = يعرف إن الغدر من موطنك عرقه وتوطينه
بحرق أوراق منتهية تبدلهـا بمن تهــواه = على اتفه عذر في اوراقكم تتهمه وتدينه
جنــود الله منصوره وعد من حق ما ننساه = ومهما زاد طغيانك مثل فرعـون بسنينه
عباد الله ، جند الله ، هذا الـدين من يحمـاه = ترى الصوره على المكشوف ما تحتاج تلوينه
تعـالوا ارجعـوا لله تلاقـون النصر بحمــاه = فمن غيره يحررنا من العادي وبراثينه
إذا نرجع إلى ربي بقلبٍ صـادقٍ مسعـاه = نصحّي ضامرٍ قد نام لو ينـوون تكفينـه
وترى ما يدري الواحد متى يرحـل إلى مثـوّاه = يلاقي نار أو جنة حسب فعله مدى سنينه
ولا يبقى سوى الرحمـن ومن يسجد لغير الله = خسر دنياه وآخرته ولو كثرت مـلايـينه