[الطائر المهاجر]

ما يكبرني الى من قيل دكتورٍ وشاعر = ولا يصغّرني اذا نوديت بفلان الفلاني
فلاني من غيّره علمه مثلما بعض الدكاتر= ولا خدعني منصبٍ او جاه يوم الله عطاني
واثقٍ بالنفس ماني من محبين المظاهر= منهجي درب التواضع بالفعل لا باللساني
قانعٍ باللي انكتب لي من الهي دوم شاكر= ما حنيت الراس ذلّه كود يعلى يوم شاني
حرّ مولودٍ على الفطره وبالفطره اجاهر= ولا اخاف إلاّ من اللي عالم السر وبياني
الشعر عندي هوايه ماني بالأشعار تاجر = ولا ني من يبحث عن الشهره وتمجيد الغواني
في الشعر معروفٍ اسمي دوم بالطير المهاجر= ولو عرفه البعض يجهل ما كتمته في المحاني
هاجرٍ وقتٍ لئيمٍ ما اهتنى به غير ماكر= ولا احترق به غير حرٍ ذاق مرّه والهواني
في الشعر القى فضائي رحب في جوّه اهاجر= حرفي الوافي جناحي في سما بدع المعاني
لا انافق لا اجامل وبالغزل لو كنت شاطر = من خيالي ابدع القيفان واسبح في العناني
ما أبي ماهوب صعب دام بالإبحار ماهر = وكل طاروقٍ نظمته ما تعثّر بي حصاني
ورغم هذا ما اقول إنّي مع الشعّار شاعر = فللشعر عندي رساله تحمل هموم الزماني
ما تكبرني اسامي ولا لي في حب المظاهر= عارفٍ مقدار نفسي ما انتظر تقدير ثاني