لاصار حولك احمق ويابس الراس = وانته تخدمه دون ادنات حاجه
تعالج امورٍ خلته دوم ياعماس = وتفك حقه بعد راح بعجاجه
بالعقل والحكمه برؤيه ومقياس= وتتحمل لأجله اهانه ولجاجه
لاتامنه يقلب بلحظه وينحاس = ويجيك هاجم بالغلط في هواجه
يمكن يشوفك خادم له اذا داس= او عبد من ماله شراك بحراجه
يبيك طوعه لو يحوسك مع الناس= وإلاّ يعدك كالعدو في سذاجه
ياسرع ما يجحد فعالك والارماس= ولو كنت وافي ينكرك في عواجه
مثله من الأفضل تخليه يحتاس = يمكن مع الأيام يعرف خراجه
يمكن تناسى انك الطير قرناس = تشرب زلال الماء وتترك هماجه
تحب فعل الخير للخير غراس = إلا اذا جاك الضرر من نتاجه
من رافق الاحمق رجع دوم بافلاس=فخله يولي تايهٍ في فجاجه