للعرب صيحات في كل بيت وكل سوق=من شعوبٍ حست الذل تحت الاحتلال
كل من بالارض عارض ولا ذاق الريوق=من جرايم جيش صهيون حزت كل بال
يقتلون الطفل والشيخ والحرمه بروق= وان تكلم راعي العقل قالو له تعال
ماحْسبو لارض العروبه ولا فيهم رفوق=كل من عاند هواهم كسوه الانحلال
شرذمه تحكم ديار العرب من غير ذوق=من جرايمهم بكى الكون واعتل البلال
عصبة الشيطان غنو على طرق الرشوق=والقنابل من لضى تلهب المسلم توال
امة المليار تهتز من جور الفتوق = ارضهم تحتل والعرض مادونه رجال
الهلع من صوط صهيون ماخلى بلوق=سيفنا بالغمد والكفر سيفه بانسلال
ناح بيت القدس والرافدين ابه الحروق=شمسنا غابت ومن ليلنا غاب الهلال
الخيانه ديدن اهل المحاجي والمروق =حل فينا الجبن خصله وقدسنا الغلال
نجمع الدولار كنا ورى جمعه سلوق = نجمعه للي ورانا ونورثهم خبال
خلف خوف وجلف نمشي ولا فينا جلوق=والعدو له حكم بين اوديتنا والتلال
الصناعه عز واهل الزراعه فوق فوق=والكسل ماله سوى الذل وضياع الخصال
كل شي من غير صنعه مأله للنفوق= يفسد البارود في مخزنه بالاختزال
اعتمدنا عالتجاره وضيعنا السموق = لبسنا والاكل منهم ومنهم مايقال
امعّات ومابنا للشجاعه من خفوق= كل قلبٍ يرتجف كنه الا في شوال
نلتمس رحمه من المشركين بكل زوق=نشتكي للمعتدي وان صفعنا مانسال
بابنا لاهل المكارم بزرفال امعلوق= والبطانات املو الكرش ثم باعو الخلال
يقلبون الحق باطل ويجنون العزوق=والجنوب يغيرونه لسادتهم شمال
يرهبون اهل المطالب بتسويق الطفوق= وان بدى فجوه طموها بتنميق الجفال
لين صرنا ضحكة الناس والكاس الدهوق=نشرب الغثرات والغير يشربها فعال
ماصفى لي عيش من حالنا والا غبوق= كل غصه تجرح الروح مافيها عدال
مالنا بين البشر قلب في ضني شفوق=يوم هنا هانت اثماننا في كل جال
الكرامه والشرف مات من بين الطروق=كل شاعر فاض غيضه ونادى للقتال
انفجر صدر الزمن وانطوى قلب الذروق=تحت صرخات اليتامى بكت حتى الرمال
المسيرات الهبتها المشاعر بالحلوق = فاض صبر الناس من هونها واذّن بلال
طالب العشاق فتح الجهاد وزاد شوق = للشهاده في قلوب العرب ميتين دال
ثارت الغيره وماردها مليون طوق= والحقيقه واضحه مابها اية مجال
كم سكتنا كم صبرنا ومابتلت عروق=كل يوم الذل يزداد مال الحمل مال
سجل التاريخ شيفاز في موقف صدوق=يوم حكام العرب للعدو قامو الوصال
يوم يطرد بعثة الشر ماهاب النهوق = دون يعرب شال الاحمال والرايات شال
حن من ظلم الصهايين في غزه سبوق=وانتهر صهيون وازلامهم واهل الجدال
والله انه خير ممن تفيهق بالشدوق = نفذ الي في دماغه وماهاب الضلال
موقفه يشهد له الغرب والا اهل الشروق=دوننا ياحيف واحنا تقل شسع النعال
ياوجودي وجد من ضاع له بالبر نوق=او وجود الي فقد خل من عقب العلال
يبدع الهاجوس للناس ياعله يروق = وان زعج بالصوت ماحن له عمٍ وخال
عالذي صاب العرب من هوانٍ مايلوق=بين خلق الله صار العرب مثل الرخال
مانحارب معتدي او نرد اهل الزلوق=خانعين ولا لنا بين خلق الله نوال
ندّرق خلف السياسه ولا نبدي لبوق=وان بدينا كن فينا من الخوف اعتلال
يذبحون شيوخنا والولد كنه سروق = مثل ذبح الشاه بالسهل والا بالجبال
يبكي العالم علينا وحنا بالفسوق = نختبي من نور الاسلام صرعى بالظلال
لاردعنا معتدي عن حمانا بالغسوق=كل مانادى المنادي نكسنا للريال
ناتحجج بالمآسي وعيينا نفوق = مقنعين الروس للعيش والماي الزلال
ماتت النخوه ولاشجارنا مامن عروق = والثمار اليانعه شؤم مافيها طلال
في سماء الحكام مابه رعود ولا بروق=والكرامه في موازينهم جاها اختلال
يحضنون المعتدي رغم ظلمه والخروق=وان تكلمنا يقولون هذا به هبال
مايشوف القوه ولا تحسس للفروق = كل هرجه ينسجه من ضميره والخيال
والله ان الوضع مزري وداعينا لهوق=غص من عبراتنا وقتنا والدمع سال
مانفعنا صوت محتالنا والا النعوق = انفصام العقل ماله دوى غير السلال
كم صبرنا عل يبدي لنا قائد يروق=يردع اهل الظلم عنا وماهذا محال
مير لاحل الفرَق بالقلوب وصار ذوق=نستسيغ المر بالليل او عقب الزوال
نبصر الحاضر وسيف الردى يفلق فلوق=ان سكتنا ضيم والصوت خافت مايبال
وين سادات العرب والحجاج الي امطلوق=وين خالد والمغيره ولباس السمال
وين عامر وين راح المثنى يالخقوق= الخلف شرهه ومتربيين على الدلال
لاصلاح الدين والمعتصم صار امخنوق=لاسعد لاعمْر لابه كريمين السبال
لاعمُر لاطارق اليوم لاالخنساء تروق=لا الزبير ولا عباده ولا رامي النبال
عزمنا فاتر وللمصخره دايم نتوق = ننكر الواقع ونختال في لبس العقال
ناتفاخر بالمزايين والكوره نزوق = وان طرى طاري المجاهد تلاقينا ثمال
عشق للدنياء تولا قلوب اهل الصفوق=يكرهون الموت والموت في شد الرحال
نفتح الشباك للناس والباب امغلوق=والطريق اشواك والورد ذابل بالكلال
كل ماصاح المجاهد تحدته الرموق=نسمعه ونقول هذا من الارهاب ضال
ارضنا جدباء وفي واحنا مانبْت فوق=والصحاري قاحله مابها غير الثعال
في سمانا لاسحابة مطر او صوت بوق=مابها الا شمس تحرق ودعوه ماتنال
مهْطعين الروس لاهل الخيانه والعلوق=مانرد الظيم عن ديننا مثل الصخال
ياغثاء السيل ياجيل بالدنياء مروق=ياعقول الزغب لاحل في جسم البغال
ياعرب لا ياجرب يامحلين الدنوق =ياسويدين الوجيه الكليحه يالرغال
يادعياء الدين والدين منكم به شهوق=مالكم بالعز مذهب ولا منكم مطال
ياجفالة دين الاسلام ياصحاب العقوق=ياربيبين النصارى وطاريكم خمال
والله ان المجد بالسيف ياصحاب النقوق=والسلام الحق معروف نهجه بالكمال
السلام الي على العز ماهو سلم جوق=ذاك الاستسلام يالي تودون الملال
من لغزه غيرنا يوم الاقصى بالشقوق=يوم ضيعنا المبادي تولانا العيال
كن بيت القدس ماهو لنا واهله حنوق=ينتهك واحنا نغني ونرقص بافتلال
مات فينا الحس وامسى بوادينا حبوق=مانفكر غير في لقمة العيش المنال
ضايعات افكارنا بين جذب وبين سوق=بس نستجدي النصارى ولانبغى النضال
حال مستغرب وتاريخنا صابه رهوق=كيلنا هافي وكيل العدو فيه اكتمال
والله انا من سلالات مافيها خفوق= غير في ركب الحظاره تولانا البطال
بالعهود السابقه ناخذ الحق امطبوق=فوق وجه الارض نسمو وطارينا هوال
يوم دين الله قائم وبالخير امدعوق =والامانه والشرف فوق روس اهل الوصال
يوم قمنا العدل عمت على الدنياء وثوق=وانكسر قيصروكسرى ودنو بامتثال
يوم كنا صف واحد تحدينا الجنوق = سيفنا التوحيد واليوم للدين اغتيال
ياوجودي وجد فيصل ليا شاف الفيوق=وانتحب للقدس او وجد من رافق جمال
اتوجد لاهل غزه ولي قلب امسحوق= وادعي الله يخذل الغرب واهل الانتصال
واتفكر في زمانٍ مضى بين اللفوق =يوم كان العز لليعربي والطيب فال
يوم كنا قلب واحد ولا فينا زلوق = والشجاعه تاج فوق الجماجم والجمال
نورنا من بدر ماهي متاهات الوقوق=والنبي سيفه على الكفرمامل انسلال
ياصلاتي عالنبي الهاشمي عد العذوق=وعدد من حج مكه ومابالكون جال
واذكر ابو بكر واذكر عمرلاهل الوسوق =وافتكر عثمان واذكر علي بيض الفعال
والصحابه خيرة الخلق من بعد الرفوق=سطرو التاريخ بالسيف ياهل الاعتدال
في صدى حطين وانسام خيبر لي زعوق=واسمع اليرموك واليعربي فوق الجمال
كني اسمع صوت حسان بالهيجاء يشوق=واسمع الخنساء تهيجن وهي بين الجلال
يالله اني طالبك للمجاهد لاتعوق = وانصرالاسلام واخذل جيوش الابتذال
ياعظيم الشان يامنشي النخل البسوق=يانصير الدين يارافع السبع الثقال
يابديع الصنع يامنشي الكون الفلوق =يالذي تلهم من الذيب ورعان الغزال
يامقدر كل شي حكمتك فوق الرتوق=ياجليل الملك عد عزنا ياذوالجلال
يالله انك رد كيد العداء في كل روق=واهزمن صهيون ياخالقي واهل البطال
يالهي ضاقت الارض من جور المحوق=كل يوم الوضع في زود والحال استحال
من بني صهيون وانصارهم ماطاب موق=والجروح اقروح والروح صايبها انفتال
اشهد ان النصر للحق والباطل زهوق=غير وين الي رفع رايته يوم النزال