اشوف الزمن يركض وانا معه بسباقي = اخايل سراب اللال واحلم بتحقيقه
خذاني شراع الوهم في بحر الاشواقي = على موجةٍ بالهم والحزن والضيقه
انادي مجاديفي وتحرص على فراقي = تقول البحر يالطير ماوالله اطيقه
تـوهقت وسط الموج ينوي على اغراقي = اقاوم بلا استسلام ما خفت تغريقه
سبحت اعكس التيّـار ما داني وثاقي = حياة الطيور بعالي الجو تحليقه
ادوّر بقـايا إنسـان في لجّة اعماقي= لعلّه يحسّ بْقلب في البعد تمزيقه
اذا من ذكرته قمت اقلّب في الاوراقي= ابي صورته تحكي سبب سرّ تشويقه
فبعض السحر ما ينفعه طبّ أو راقي= ومهما تحاول زاد بالحرق توثيقه
صنـاعه سعـوديه يخلّيـك تشتاقي = سقتنيه نجديّه وانا اجهل اباريقه
اطالع واشوف الدمع بالعين دفاقي= تناثر على صدري وحسّيت تحريقه
وعباره على الصوره وفيها الحزن باقي= وعليها حروف اسمه وبصمات تصديقه
"انا ما لقيت الحبّ الاصلي بعشّاقي = فكلٍ خلف طبعه وخان بْمواثيقه"
صرخ قلبي اللي ما عرف فجر الاشراقي= علام العتاب اليوم تبدي بتسبيقه
حرامٍ عليك اللي تقـوليه لاحراقي = وانا من يحسّك دوم باقصى معاليقه
تعالي ضياء الكون فالكون بي ضاقي = تعالي وجسّي نبض من طال تعليقه
انا وانتي بالدنيا سجينين الفراقي = ولو كنتي السجّان أنا وانتي بْضيقه
احبّك تسجنيني ولو زدتي وثاقي = احب الوثاق بْقرب اجمل مخاليقه
انا سيفك البتّار والظامي الساقي = وانا لك جناحٍ تسبحي مع مطاليقه
حبيبي ترى طعم العشق فوق الاذواقي = وانا ذقت طعم الحب والشهد من ريقه