السلام عليكم
صباح / مساء الخير والمسرات على الجميع
وجهات نظر متبادله كانت بيني وبين أحد الزملاء واسمه عميش الشمري
اصحابنا ياكثرهم بالمسايير=وياكثرهم لاصرت تبغى الوناسه
وان كنت محتاجن لبعض المناعير=يقضي لزومك لاتعقد امراسه
تلقى الربع يعطون جملة معاذيير=ولافيه منهم من يجمل الباسه
الطيب عنهم بعد برزه عن النير=وقلوبهم تردح بخس ونجاسه
طرق المهايط عندهم بس لاغير=ولاالمراجل مالهم به حماسه
وسط المجالس كنهم سالم الزير=وان حلت الهيجاء غدو كالبساسه
واللي كرم منهم يعد المخاسير=ويزيد همه بين ربعه وناسه
والصحبه الي مثلهم مالهم غير=بعد اوجفى حتى تزول الخساسه
عميش بن عواد الشمري
وكان جواب الصوت بهذا الصدى
بعض العرب ياعميش مافيه تقصير=شهم(ن) أصيل(ن) مايعرف الخساسه
عند المواقف يعجبك فيه تقدير=وفيه الذرابه والأدب والفراسه
وبعض العرب تلقى بهم نافخ الكير=وتلقى لباسه لطخته النجاسه
والبعض منهم فاغر الفاه ماغير=يسرح مع العربان مضروب راسه
يمشي يدربي الراس مافيه تدبير=واحيان يلبس ثوب ماهوب قياسه
والبعض هرجه مثل هرج الهوامير=وتلقى الفلس ماخذ في وجهه مقاسه
وفيهم حقود القلب يحتاج تطهير=والنفس نفس ابليس تلقى غراسه
هذا جوابي والعرب فيهم الخير=وانت الفهيم اللي أصيل(ن) أساسه
خذ مايناسب ربعنا دون تفسير=خابرك فاهم مقصدي بالفراسه!!
عبدالعزيز بن سعد العمار
مودتي وتقديري للجميع