اقتباس:
المشاركة الأصلية كتبت بواسطة الطامي
تأثرت بما تمر فيه والدتي لكبر سنها احسن الله خاتمتها بخير وجميع المسلمين،،، وتذكرت مانمر فيه اذا وصلنا لما وصلت له وهاضت قريحتي بالتالي :-
يالله ياللي لاجل وجهه سجدنا = اللي عطانا الدين نمشي بنوره
مما نشوف اوصي محمد ولدنا = وكل الاخوان اخذو كلامي ضروره
يامحمد المنعور والا فهدنا = مع احمد وايضاً صغير البزوره
يالقرم ياللي من خوالك نشدنا = اسمع لقولي ثم تمعن سطوره
ياليث ياضرغام وانتم سعدنا = اقولها للكل ماهي محكوره
من بعد مشراف الشعيب انلهدنا= وزماننا ذقنا حلاه ومروره
اوصيكم فينا لاتردى جهدنا = واقبل خريف العمرواقفى بشوره
ان كان مامتنا ومعكم قعدنا= بعد الشباب العمر يمشي حدوره
ماينعرف برق لنا من رعدنا = واللي فقدنا من قديم ندوره
قرب البكاء منا وقرب حشدنا = قصرالنظروالسيرجابه خطوره
اشرف علينا ان صحينا ورقدنا = واشرف على ماكولنا مع بهوره
مانقدرانضيف اللحاف ان بردنا = والسلك مع صغره مانقدرعبوره
نمدح ونهثم والعتب هو مددنا = وندوج بين ابيوتكم تقل دوره
وقفو هل القالات معنا بعهدنا= البعض جاه اشوار تخلف بشوره
وان جالكم في كبرنا من هددنا = اخوان والااخوات ماهي معوره
افرش لهم ردنك وكنه بيدنا = وافرح بهم والوجه زود سروره
الاسم واحد به نزود عددنا = ويمنا بلا يسرى تراها معثوره
واذا سؤلت تقول ذولا عمدنا = الدم واحد شوف الاسم بسطوره
لاتطيع فيهم من تسلطن بعدنا = حقده دفين ومرمسات بذوره
واكرم قراباتك والادنا بالادنا= ومن كان لك مٌحرم لزومٍ تزوره
الوصل يصِل من حباله رهدنا = والقطع يهلك من دنياه معموره
لاعل يدعو لك ولنا في مهدنا = وزيارة ود الأب ماهي محظوره
واوصيك دينك حيثنا به رشدنا = ان كنت وسط البحر والا بروره
|
صدقت القصيد فجا مصدوق صح لسانك وبارك الله بك