لقد القيت هذه القصيدة في الملتقى الرابع للشيخ محفوظ نحناح لسنة2007
الشيخ نحناح هواحد اشهر العلماء والمفكرين والسياسين في الجزائرالمعاصرة رحمه الله
*حســــــــــرا ه عــــــــــلى الـــــــدهــــــــــــــــر*
حسراه على الدهـر ومـرارو=لا يـدوم زهـو حـال زيـان
سوَى بين كبـارو وصغـارو=في المصايـب كلهـم قـران
صـد لينـا كوانـا بـنـارو=جاء في شيخ عنا مـا هـان
ذاك يـوم يصعـب تصـوارو=في ذا المـوت الصبـر خـان
جوان مشوم محتـاه نهـارو=جاء هموم دمـوع و حـزان
الشيخ المحفوظ نعاو خبـارو=راح ألمثـواه فــي امــان
لحق رفيق عمرو ومشـوارو=حتى في اللحود رقدو جيـران
واش تدو يا مقابر و تختـارو=خيرتو خيارنـا ليكـم سكـان
مصعـب فراقـو لأهـل دارو=بعدو من ليهم عطوف حنـان
فراقـو واش يطفـي جمـارو=عليهم وعلينا تفجـر بركـان
لا يتـزادو أيـام إذا قصـارو=كل مـن عليهـا لابـد فـان
قـدر الله ومرحبـا بقـدارو=ومنهم ومنا صبـر وسلـوان
سلـك طريـق قبلـو سـارو=وبعدو أيسيرها كـل إنسـان
وكـل ميـت الـمـوت زارو=من آدم حتـى آخـر زمـان
الفـرق موتـانـا واش دارو=واش خلو ما يمحيـه نسيـان
المرحوم بقـات فينـا أثـارو=يكفيه جمع مرسوس البنيـان
فضلو باقي تسقينـا سـرارو=تروينا علومو سنـة وقـرآن
فهمنا الصعيب سهل اوعـارو=ونهجو لينـا تركـو ميـزان
نهـج الإمـام لينـا اختـارو=كـل الفخـر سمَانـا إخـوان
صبحـان الله لحقـت نـوارو=تقرت ودشورها نـورو بـان
ما يخفى قمر علـى نظـارو=ما يخفى نور ضوَى المكـان
شيخنا العلـم علـى مقـدارو=رفـع الشيـخ قـدر وشـان
في سبيلـو كثـرت اسفـارو=ضحى بوقات ما تقدرها ثمان
المخلصين في العيون يكبـارو=وربي يعطيهم قـدر الإيمـان
تصدق بعرضو للـي غـارو=زيد يلاقيهم متبسـم فرحـان
مثل غيـث نازلـه أمطـارو=مـا يبخـل بمـاه العطشـان
مثل بستان زاكيـة اشجـارو=بثمارها مـا تبخـل جوعـان
والشيـخ محلاهـا ثـمـارو=مسقية جذورها برَ وإحسـان
سامح حتى من عليـه جـارو=وظالم الشيخ هـو الخسـران
طايع بليس خاضـع لعفـارو=مسوَد ليـه قلبـو و شيـان
ماكـر مكـرو زاد تمـكـارو=ومكر الله فوق كـل عصيـان
عديان الحـق زمانـا كثـارو=ضد الاحرار مطرقين اللسـان
لا دام الشر و معـاه شـرارو=مهزومين أنصارهم في نقصان
الواد ما يشد غيـر حجـارو=يبقى الصح والباطـل دخـان
يرفع شـان الوطـن حـرارو=مثلو نحناح ومثالـو شجعـان
حملـو همـو وهـم خيـارو=لقاهم في الشدة ليـه فرسـان
فضل الشيخ لا عاشو نكـارو=وما ينسى فضلو غير خـوان
تسعتاعش جوان ربي اختارو=بكات حمس من أجلـو حـان
يـا ربـي تغفرلـيـه اوزارو=وتمحيها بعفوك يـا رحمـان
بحق القرآن وكنوز سـوارو=بحق سنـه هادينـا العدنـان
بحق العلـم وجميـع أحبـارو=بحق كل من دعاك يـا حنـان
بحـق بيـت الله وعـمـارو=بحـق كـل حفـاظ القـرآن
بحق كـل مـؤذن و تبكـارو=بحق ما ترفـع صـوت آذان
بحق الذكر ومأثـور أذكـارو=بحق ما تحابو فيـك إخـوان
بحق مـا زرع فينـا أفكـارو=بحق ما زرع في الوطن أمان
نولو الفردوس وطـه جـارو=ويحضر فيها منابر الرضوان
ولاقينا بيـه نكونـو جـوارو=والصالحين في رياض الجنان
بعدو شيخنا حبابـو احتـارو=من يخلف نحناح ويعمر المكان
من يخلف نجـم عليـه دارو=النجوم وهـو قمـر الزمـان
لكن الله ما ينسـى انصـارو=اللي بناه شيخنا في الضمـان
راعيـه شيـخ ربــي دارو=سلطاني فيـه هيبـة سلطـان
جمعنا بيه يصعـب تكسـارو=ويصعب أيفتَـن بينـا فتـان
متمسكين متحصنين بصوارو=يحمينـا كيـد كـل شيطـان
لمواج العاتية يحسن تبحـارو=سفينـة السلـم ليهـا ربـان
يطول عمرو و يحسن تدبارو=وحمس لخيار الرجال خـزان
ملتقانـا لا يتمـل تـكـرارو=في ذكرى الشيخ كـل جـوان
في كل عام يترحمو حضـارو=على شيخ ضمنـا بتحضـان
الوفاء لأهل الفضـل شعـارو=وحسن العهـد لينـا عنـوان
ثابتين ضد التغريب وتيـارو=نهجنا نصرة الدين والأوطـان
يشعر الشاعر ويفخر بشعارو=بيات للشيخ شكـر وعرفـان
*************بالمصطفى الجموعي