السلام عليكم ورحمة الله وبركاته..
قصيده من الاشيف.اتمنى ان تلاقي القبول..
اليوم بهلول الوسم تلقى ام سالم فايقه=يحيا الامل فيها ويالله ما تخيب آمالها
ترجي من الله مثلنا صب المزون السايقه=على الجزيره كلها بسهولها وتلالها
براقها ما ينفصل والرعد صوته شايقه=تبشر بخير يعم الناس في منزالها
لأجل الربيع اللي يفرح كل نفسٍ ضايقه=من البشر والسائمه من ضينها وجمالها
عشرة شهور من السنه البر مابه ذايقه=يالله تعوضها الحيا بعد جفاف نالها
وعساك يا فياض السدر والطلح دايم رايقه=باللي حيابه كل شي الله بوحيه قالها
وعساك يا سهول الوطن بالزهر لونك لايقه=زهر الربيع اللي تفوح عطوره من خلالها
اليوم بهلول الوسم تلقى ام سالم فايقه=تغريدها بشلوعها وتغريدها بمحوالها
عبدالله الشويمان-الرعد