[الطائر المهاجر]

الرجال جمال لا انقهرت تثور= ما يتحمّل قهر ياكود البليد
تاخذ الثارات ما تعرف فتور= لو يطول الوقت ما تنسى الضديد
والجمل يكتم بصدره ما يفور= ولا ضرب يضرب لخصمه ما يزيد
لكن الرجال من كثر الحرور= مايفرق بين خصمه والبديد
لا عجز يثأر من الذيب الجسور= حط غيضه في طيورٍ ما تفيد
ولا تفكرنا ودققنا الكسور= نعرف ان القهر ماهو بالجديد
وسط غابه دون (واوٍ) او ظهور= ينهضم حقك وتشعر بالوقيد
ولو صرخت وقلت حقي ياغيور= ما تلاقي رجل في رأيه رشيد
او يماطل بك مع سنينك شهور= لين تيئس ثم تنسى ما تريد
لكن الندبات في صدرك حفور= ودامك موظف تلاقي من تصيد
من مراجع ينتظر ياصله دور= ولا وصل يمّك تزيده بتعقيد
تفش غلك فيه في ظلم وجور= وتحرمه من حق واجب بالجحيد
مستغل لسلطتك تلبس دثور= تحرف القانون في دربٍ تريد
ولو يجيك الأمر من ذات الخدور= قمت واقف باحترامٍ للعبيد
القهر ينتج قهر يكوي الصدور= ويتحدر مثل سيلٍ له رعيد
الأمن يختل من بعد الحبور= وكل ينهش في الجسد لو هو عتيد
والضحايا كثر في وقت الفجور= ومن يخاف الله فلا له من عضيد
كل ما يبنى على الباطل يخور= والعدل لا راح فانتظر الحصيد