[الطائر المهاجر]

تغيرتي مع الأيام وصرتي ضمن عدواني= اواجه مين والاّ مين/ هموم الوقت وإلا انتي
كفاني من الزمن ظلمه/ كفاني منك ماجاني = تحطّم كل شي فيني/ ولا تدرين/ لاهنتي
اطالع صورتي مدري/ اهي لي/ او لاحد ثاني= نحيل العود مجروح الفؤاد وفيه اثخنتي
وهم والاّ حقيقه تبعدي وابقى على احزاني= ولا غيرك سكن قلبي ومن نبضه تمكّنتي
تعاهدنا فكيف العهد تلاشى كن ما كاني= ونا باقي عليه اطرد سرابك وين ما كنتي
حرام اللي يصير ولا دريتي ويش اضناني= حرام إنك حرمتيني ولا لبعض العهد صنتي
تنامي ما تحسين السهر والسهد باوجاني = افكر وش حصل حتى بتعذيبي تفننتي
تركتيني مع النسيان اعاني مر حرماني= وسليتي ما كأنك عن يقين الحب آمنتي
انا ماعاد فيني حيل تهاوت كل اركاني = احاول انتهض مقدر مدامك بعد ما اذنتي
تعالي نفهم اللي صار ونعرف منهو الجاني = تلاقي قلبي المتهم بريٍ ولا تفطنتي
تعالي وامسحي جرحه بنبضة قلبك الحاني= تعود له الحياة ويبتسم حظه الى لنتي
عتب يوقظ حروف الصمت من اعماق وجداني= تكسّر في جدار الصدّ والإنقاذ منك انتي