[عبدالله راشد الثويني]

لو قلت مهمـا قلت .... ماقلت وش قلت ؟ = شرواك مهما قال .. بالفعل ماطـال
وإن رحت بهروجك من الخبث .. واقبــلت = والله فلا تطريّ بلحظه على البال
بالقاع تبقى .. ياعذولـي .. ولا زلـت = والقاع لك ياعاذلي .. خيـر منزال
عنـّـك وعن شرواك .. صدّيت .. واقفلت = قلبي ولا لك يآسود الوجه مدخـال
فلا تضن إني .. بهرجك تبهذلـت = الحمد لله راضـي بكل الاحـوال
إن جتني الدنيا على ما تأمـلت = شكرت منهو فالسماوات .. متعال
وإن ضاقت الدنيا .. لحكمـه تقبـّـلت = ماخاب منهو في رجا . الرب .. مازال
وإن شفتني لك ياعذولي تحمـّـلت = فلا تضنّـه ذلّ .. او مركبي مـال
حسبي بك اللي عالم(ن) كل ماقلت = ياخذ حقوقي مِـنك .. في يوم الاهوال