[الطائر المهاجر]

القطار وفات ما نلحق عليه = وشمسنا في الأفق تنوي بالغياب
ما بقى من طيفك اللي احتريه= غير ومضة برق في درب الإياب
من بعد ما كان حلمٍ ارتجيه = انتهى في ليلي المظلم سراب
كيف كنا ووين صرنا يالنبيه= وكيف نمشي من ضبابٍ في ضباب
ما خبرت انك مزاجي او سفيه= لين شفتك في مراهقة الشباب
تتبع اللي دون وعي تشتهيه= ما تفكر في حساب ولا عقاب
من صدق معنا فحنا نشتريه = ومن صدع بالحق منّه ما نهاب
ومن ضحك بالوجه ندري وش يليه = ماخذين الحذر من ذيلٍ وناب
دربنا الواضح يبي منهو يبيه = ويرفض اللي ماشيٍ دربه عياب
ومن خطا ماني من اللي يحتميه= اتركه يدفع كشوفه والحساب
كل إنسانٍ بما تكسب يديه = ومن مشى في الصح ماطاله عتاب