الشر يجلب شر والخير للخير = والثأر عند المودماني سجيه
اما لنفسه او لأهله او الغير = من الأقارب او لعرض وحميه
ومن اخطر الثارات من دون تفكير= ثاره من اجل الدين عن صدق نيه
لاشاف طيارات بالجو كالطير= تقصف وتقتل في نفوس بريئه
من نفس دينه دون ايات تحذير= من دولة عظمى مشت بالدنيه
والعذر حرب ارهاب قتل وتدمير= وتشريد لشعوبٍ تعيش الأسيه
وهي من ورا الإرهاب صنع وتصدير= من اجل تاصل للكنوز الغنيه
قوه تدار بطغمة من هوامير= خلف الحجاب وما درت بالرعيه
ماهمها شعب انحدر في الدحادير= فقر وبطاله عايشٍ ف الرزيه
حتى ولو في وسطهم صار تفجير= وصار انتقام من ضحايا الأذيه
كل ما تبي تهيمن على الكون تسيير= وتمتص ثرواته بعينٍ جريه
وتقتل بلا تفريق عجز ومطايير= وتشعل حروبٍ بين اخ وخويه
حتى تتدخل في ثياب المغاتير = وتناصر اللي من عقولٍ غبيه
يخضع لها في كل امرٍ وتدبير = ولو يعترض تلسعه لسعات حيه
وتفرض بداره سوق من غير تخيير= تبيع فيها كل هزل ورديه
يعني كذا استعمار من غير تشهير= خفاش دمه من دماء الضحيه
ومن كثروا اعداءه فلا هوب في خير= فكثر الوخز يطرح جمالٍ قويه