[الطائر المهاجر]

تدري وش اللي يقهرك بعض الاحيان= لاشفت بعض الطرش ماسك اداره
مع بعضهم حزبٍ منظّم بلا اعلان= ومع بعضهم في كل سلمٍ وغاره
ولا حساسهم بالنقص في كل ميدان= لا جاء المواطن ذاق منهم مراره
إلا إذا له "واو" ماحس نقصان= كلش يسوّى له بطرف الإشاره
ومن خبرتي معهم بلا اي بهتان= كلش حلالٍ عندهم كالتجاره
سرق ونهب من غير خوفٍ وحسبان= وحتى الرشاوي عن فنون وشطاره
المشكله وصلوا بذله وحقران= والبعض منهم صار حول الصداره
ولو جيتهم وانته من العلم مليان= قالوا بدو علمٍ بمثله خساره
هم في نظرهم من رفع عال الاركان= وهم في نظرهم اهل علم وحضاره
ماشفت فيهم غير تمثيل باتقان = واقلّهم تلقى بنفاقه مهاره
مادامهم يدرون عن صاحب الشان = واللي يبي من مدح يعلي جداره
عصابةٍ كالسوس تنخر بالاوطان = في كل شبر بلفةً واستداره
النفط جمّعهم من اشتات الاكوان= بارضٍ اهلها تنخدع بالنظاره
والمصلحه قانون من جاك جوعان= ولا من شبع يكويك من حر ناره
ولا صاح صياح المنادي بالاحزان= على دياره راح معه ادخاره
لوهو بيدّي قلت ياضراب الاعطان= هذي البواخر كل راس ووزاره
وافتح مجال لكل من كان عطلان = من الشباب اللي توالى انكساره
باسبابهم واسباب لافي وشفقان= ممن لقى له من غدا له ستاره
من اللي ضميره مات من عدة ازمان= واعطى الأجانب ضو فوق اخضراره
حتى غدينا بين مطرق وسندان= بطالةٍ معها الغلا باحمراره
واستثني القله فهم خير برهان= على ضميرٍ حي يفرض وقاره
فيهم رجال اخيار معنا كالإخوان= كلٍ لعز الدار يرسم مساره
الدين جمّعهم على حب وإيمان = نقوه شريفه مابهم من قذاره
والدار ماهي ملك لفلان وفلان = الدار للي في فعاله جداره
واللي اناني ينكشف كيف ماكان= لو هو ولدها يستحق احتقاره
لكن ولدها لو تمايل كالاغصان= في يوم يرجع عارفٍ قدر داره