[الطائر المهاجر]

احدٍ فقيرٍ وما لقى لقمة العيش = واحدٍ من التخمه يبذر حلاله
هذا بليّا شغل يصرف على جيش= وهذا يدور شغل مير استحاله
يموت حسره لا تنبّه على ليش؟= من طفل ماله ذنب يطرح سؤاله
ولا شاف بزرانه طيورٍ بلا ريش= الجوع واطيهم وهو في بطاله
عاطل يبي له شغل لو يلبس الخيش= مهما يكون الشغل فوق احتماله
جنسيّته نقمه .. خليجي وحتيش = لو كان وافد يشتغل بالكفاله
من يوم يسأل جا له الردّ تطفيش= لو هو لبس وزره وغيّر بحاله
خل المصرح ينفعه بالتفاقيش= وبيع الكلام اللي قصر عن فعاله
مثله الوفٍ ما لقوا لقمة العيش= والاجنبي يرثع ويرسل حلاله
وهذا من النعمه على مركب الطيش= في كل ديره سابح في ضلاله
بين القمار وبين شقرٍ مغاشيش= امضيّع الطاسه بدرب الرذاله
ماجابها من بعد كدٍ وتحويش= ولا هو ورثها من عمام وخواله
لانّه بطانه شنطته دون تفتيش= يضرب بسيف العم دامه رخى له
عنده فيز والآف من هالدراويش= وتوظيف الأصلي مايجي في خياله
يسرق وينهب ماكفته البخاشيش= همّه رصيده لو حرامٍ نواله
ولا من مشى طاووس من نفشة الريش= وقدام عمّه يحتري للتفاله
من عقبها يعطى الرضاوه مقاحيش = ولاّ أوامر والختم باحتياله
متناقضات في زمان به الطيش= واللي بعقله مخطرٍ من هباله