وجه لي سؤال في احدى المرات وقالوا معقول ماحبيت يالعود
وكانت هذه الاجابه في هذه القصيده عسى ان تنال اعجابكم
قالوا تحب وقلت انا حبي كبير=اكبر من البحر المحيط وساحله
لان الحبيبه وصفها ماهويسير=يعجز لسان اللي وقف مداح له
فيه الدلع فيه الغنج حسنه مثير=من دون خلق الله قلبي راح له
لاهو متين ولاطويل ولاقصير=مربوع جسمه والخواصر ناحله
طويل عنق وصدر نهدينه زبير=كلما زبر نهده وجد مفساح له
والشعر الاسود من ورى كتفه غزير=من طول شعره لامشى ينماح له
ياحلو شعره فوق خدينه نثير=الى انتثر فوق الجبين وجاحله
يبين وجه(ن)كنه البدر المنير=لابان نوره للظلام وزاح له
والرمش لاسلهم حلاة الرمش غير=فوق العيون اللي من الله كاحله
كن الشهد يقطر من اشفاته قطير=شهد(ن)مصفى من خلايا ناحله
لاحل طاريها على قلبي يطير=يطير مثل اللي خفق بجناح له
عليه من نسم الهوى قلبي يغير=ويحق له مادام قلبي طاح له
هذا وانا اللي باختصر وصفه كثير=خوف العيون الحاسده تنساح له
هو حبي الاول ماهو حبي الاخير=واللي مضى ماعاد انا طماح له
تدرون هذا الحب كم عمره يصير=اللي غزى قلبي وغصب اجتاح له
هذاك حبي يوم انا شب(ن)غرير=قبل اربعين من السنين الراحله
واليوم لوجيت ابارجع واستخير=باب الهوى ماعندنا مفتاح له
استغفر الله مالنا بحبه خشير=اللي غفر ذنبي وسري باح له
ياسائلي جاك الخبر واسأل خبير=واقرا الخبر في منتدى الفطاحله