الراس شاب وقلبي اليوم ماشاب = كني شبابٍ ما تعدى الثلاثين
لا من نصحته مفتهم لي ولا تاب = مفتون في شوف العذارى المزايين
يفز كالحاقول لاشاف له داب = ودّه يطير ولا نبت له جناحين
مدري متى يركد قبل يوم ينصاب = ويغرق ببحرٍ خادعٍ للمحبين
وتْجيه غارات النواعس والاهداب = تاخذه معها مادرى تاخذه وين
مرٍه اقول انه يبي عسف وعتاب= ومرٍه اقول الحق معه ابراهين
فمن لايحب الزين من عكف الاشناب= ماهوب حي ولو يعمّر مدى سنين
وطاوعت قلبي لكن الظن ما خاب= ادري خفيّف لا لقى داعج العين
ليلة خميس وشاف من يفتح الباب= ظبيٍ بنور البدر في ليل تشرين
غضٍ غضيض الطرف من عال الانساب= مانيب حوله لو ملكت الملايين
قرّبت حول الباب والقيت ترحاب = واقعد على الزلفه وهي ترقب الشين
عودٍ نحيلٍ من نظر له فلا ارتاب= شوفه قليل وماتعدى الحجاجين
عطشان ما به حيل من كثر الاتعاب = من يكسب اجره مالقى عضد ومْعين
قالت غريب وقلت من ضمن الاغراب= قالت تفضل راجعه من بعد حين
وادخل واوقف انتظر عال الارتاب = والبس درابيلي لعل اكشف الزين
وجتني تبادح كنها كاعب اتراب = والعطر يسبقها بورد ورياحين
وجسمٍ شبه عاري فلا ستر وحجاب=يوم اقربت وثري عمى القلب والعين
اعجيّز شمطاء بها الفكر يرتاب = لو شافها الشيطان قال الهرب وين
تحلق شنبها والفناخر كالابواب = خدامة جتنا من اقصى الفلبين
وانحاش منها مثل من تلحقه داب = لاعاده الله قلبٍ اخضر على لين
من طاع قلبه علته مالها اطباب= إلا بعقلٍ يحكمه منهج الدين