ياصاحبي لاصار مانت بكفو لامنّك حضرت=ماعاد ابي لك فزّعةٍ عندي ولابي لك حضور
لاصار ماجا للروابع في مجال الطيب كرت=فلاخير في نفْسٍ تفاهق في مهمات الامور
انا على درب الوفا واهل الوفا والطيب سرت=ولاينومسني خوي الدرب لاصار مْعَثور
ماهمّني لاقالوا انك شنت فاصحابك وبُرت=مالي ومال الخوة اللي من دبورٍ في دبور
ولاتحْسب اني لاخِسرت مقابلك اني خِسرت=لابالله الا فكّنا ربي من قصار الشْبور
لاصار منت بمحْزمٍ لي لابغيت اثور ثُرت=مانيب ابي لي محْزمٍ لاقمت في جنبي يثور
رح غير مأسوفٍ عليك وياكُثر صبرٍ صبرت=على مثل شرواك ممن خِوّته خوّة عبور
والا انت ياللي في دروب المرّجلة سِرْت وعبَرت=ليتك تويق تشوف مقدار الغلا لك في الصدور
ياللي ليا منّي نخيتك ساعة الفزعة طمرت=ماتحْسب حسابك مع الطمرة ثرى والا صخور
طمرة حصانٍ دونها يالكفو والله ماقصرت=الا وفيت وجمّل الله حالك وماجا قصور
في ساعةٍ كان العُذر يمنعك منّي ما اعتذرت=ياطيب طيبك يوم شِلت الحِمل يالشهم الصبور
خوّتك هذي عندي تجارة لو انّي ماتِجرت=شيك ورصيدٍ في حسابي لابغيته مايبور
خوّة رْجالٍ ماتغيّر لاكِبرْت ولاصِغرت=ماهي بِتغّذَى من حليب المصلحة حده يفور
خوّة زحولٍ تسند البنيان لامنّك عمْرت=تِرّفع على خُوّتهم بنايات وتعَمَّر قصور
اما كذا ياصاحبي وقفتك لامنّك حضرت=والا فلابي فزّعِتك عندي ولابي لك حضور