[الطائر المهاجر]

الا يالله عفوك ما ابي جاهٍ ولا اموال= ابي لو ترزق عيالي وظايف يعملوا فيها
بوقتٍ يشتكي فيه الشباب بضايق الاحوال= بطاله دون حل وما لقينا من يداويها
ومن له واو او ظهر يلاقي مايبي بالحال= ومن جا بعد بعثه فالوظيفه ما يلاقيها
بديره خيرها للاجنبي والذيل والطبال = وتنسى عيالها ممن بوقت الضيق يحميها
ولا تدري بأن الحر لو يصبر على الاهمال= تجي له لحظةٍ يكفخ عن دياره واهاليها
وبعضٍ يستغله عاديٍ او يتبع الدجال= ويصبح حاقدٍ يسعى خرابٍ في اراضيها
ترى اهمال الشباب بلا شغل بيشجع الانذال= على تسخيرهم لاعمال ماندري بتاليها
عصابات الجريمه تستغل العاطل البطال= بسرقٍ او بإرهاب وافساد بنواحيها
ومدام ان البلد ما به مصانع تخدم الاجيال= فضروري من اقامتها وهم من يشتغل فيها
ولو كان الأمر عندي لاقوم بشغلة الإحلال=مواطن في مكان الأجنبي واقبل تحديها
واي متسترٍ يوقف بلا تقدير او اجلال= وتصادر كل املاكه ولو هو من اعاليها
كذا اضمن شبابٍ رافعٍ للراس بالأفعال= يحس بقيمة الديره ومن روحه يفاديها