جانا الهوى من شمال المملكه صافي وغلاب=يقول ياحيّ معْك الليل والمغرم صبابه
على جناح الغرام الشوق له شاوي وثلاّب=فوق الثرياء ونجم سهيل حسّه وانتحابه
عاجي غنج مبتهج لاسج ماج ولاج الاعجاب=من عاج والتاج والجاوي وحجانه حجابه
لاتنشدوني عن التيار سلكه سلك سلاب =من الزمرد وبه مرجان والشوق التوى به
عطرالخزامى من انفاسه ورنّة عودزرياب=صب الوله صب تالي الليل واغراني انسكابه
ماخاف من خالقه والشهد سال وبلل الناب=وصار شلال شاق القلب همره واسترابه
ليته ترفق بقلب الصب ماخلاه منصاب =ولالبس ثوبه الضيّق ولي بيّن روابه
يحلف برب السماء وانا حشى ماقلت كذاب=انه يصون الهوى والوقت مايخلف حسابه
ماحترت من حبه الجارف ولادورت الارياب=لان السيوف الشطيره ماتنازحها حرابه
يقول انا الحب وانت الي لقلب الصب الاطباب=افديك بالروح ياحبي ولك عندي مهابه
لك في خفوقي صدى النهرين ياحبي مع الزاب=ومن تعاليل ابي الرقراق لابس منك كابه
جبال لبنان غنت لك وغنّو فيك الاحباب = وفي عدن نور من وجهك وفي صنعاء انجذابه
من حول حائل عليك الجود صبغه بين الاغراب=ومن جبال الحجاز الود في قلبك صلابه
ومن ربا نجد لك نسمة عبير وفوحة اطياب = وحب قيصوم من حول القريات احتسابه
لك شوق مكه بقلبي والمدينه واهل الاطناب=ولي بقلبك جبال الاطلسي مامن غرابه
الي سحرني بلهفة خافقه والشوق سلاب =ماني بسالي عن انغامه ولا روعة جنابه
اناظره يوم طاب الليل يزهي كل مرقاب=من زين صوته ووناته برى الخفّاق يابه
يقول حبك سطى بالروح واصبح حول الارقاب=يازين منطوقه الطيب ويامحلى عتابه