[ابو أنس]

ياشيخ هوّد لاتوتر وتشتان=وارجع لحكمك لو من الشرع قاريه
واحذر تقص إيد الحرامي اذا كان=عابث بخيرات البلد لاعب(ن)فيه
والقاتل اللي حكمه بنص قرآن=لاتحكم بقتله لزوم(ن)تراعيه
والزاني المحصن ولو فيه برهان=يوجب عليه الرجم ذا الحد تلغيه
ياشيخ ماتعرف عن حقوق الا نسان=قانون محكم بينات(ن)مواريه
الى صدر حكمك تلاه الف عنوان=تلقفته من الصحف صحف تشويه
ثم(ن)برز مية محامي له اعوان=واستنفر العالم بعيده ودانيه
وحشية احكامك غلط لازم اتدان=لزوم للرحمه مجال(ن)تهدّيه
منطق عسل في طيته سم ثعبان=المقصد أحكام الشريعه تقزّيه
والا يعد انسان غزّه مهو انسان=وكلابهم تنهش بلحمه وتوذيه
أطراف مبتوره عن أجساد وابدان=واطفال مقهوره من اللي تلاقيه
واجيال مطروده من ديار واوطان=وعجوز ما لاقا له جدار ياويه
والدم يجري في الشوارع والاحزان= من كل حدب وصوب صعب(ن)نداريه
واحد(ن)معه جثث حبايب وخلان=ترقد معه وارضه عجب ما تواريه
وابو(ن) عجز يحكي ولو عرضه يهان=فوقه سلاح بقلبه الجرح تساميه
مدري وش حقوق البشر وأي سلطان=يتحكم بتوجيهها واي توجيه
مادام حكم الرب يوصف بنقصان=والأبريا تجري دماهم بتسفيه
والكل نايم في العسل ليله الوان=بين المراقص والمقاهي تلاقيه
او يشرب القهوه على ذبح غلمان=مادام دينه مسلم اسرع وذكّيه
منطق عوج ميزانهم خوش ميزان=له كفّة(ن)ترجح على كيف قاضيه

سعد
17/1/1430هـ