[فارس القوافي]

اتلذَذ بريحة عطرها في الثياب = واتباهى بها بين القلم والورق
واكتب ابيات شعرً ندّها بالسحاب = واحتويها مثل طفله تخاف الغرق
واسرق انفاسها من بين نابٍ وناب = واكتفي بالجمُر لا تاه بي واحترق
واشبِع العين فيها شوف لو هو سراب = واشرب الشهْد من ثغرٍ بحبي شرق
بالجمال ارتوي وأسجّ عن كل باب = واتقهوى غلاها واقدع احلى ارق
ساهرٍ والهوى يسري ولا ليل تاب= كيف باتوب عن جنَه حلاها فرق
كامله بالوصوف ومن نظرها يهاب = مالها اشباه بالدنيا بحسنٍ برق
وجهها مثل بدرٍ مكتمل في الحساب = وعينها عين حرٍ من لمحه ادَرق
وجسمها لا نظرته ضعت ياذا العذاب = واختلف في مساري تايهٍ في الطرق
قبلها كنت شايب ماعرفت الشباب = مير من شفتها قلبي عشقها ورق
ليتني من صغر سني لها بالكتاب = وليتها لي وتبقى في كتابي ورق