[نجم الإبداع]

اخواني الكرام
جأني احد الاخوان من رحلة استجمام وليله رومنسيه
نفض فيها الجيب هههههه الله يجيرنا واياكم ويهدينا جميعا
وترى أخواني ( كثير ) عساهم سالمين %( ابناء بلدي)
واحببت ان اهديكم هذه الفكره
امل ان ترقى لذائقتكم

وصف لي احد الحسناوات الراقصات الفاتنات
( حسبي الله عليهم في شبابنا)
شوف الاسم يارجل ؟ (غزلان)

فقلت على وصفه

ردوا لغزلان بالله السلام = يالي على الجسر بكره طالعين
قولوا لها العين جافاها المنام = والقلب مابه سوى شوق وحنين
ياوجد روحي لممشوق القوام = اليا تبسّم يثير الخافقين
الوجه يخجل منه بدر التمام =والطرف يسبي وسحر الحاجبين
لاهز عمره ترى العالم قيام = بالورد رشو وغنو الحاضرين

هنا ياصاح ؟
ياساتر استر! احدهم (50000) ر. رش ! اش هذا ؟ عالم دفيعه
وكرم حاتمي وانشكاح !على ماقالوا ! ونقول ليه تطيح الاسهم
الله يهدي الجميع

لولاك ياصاحبي سقت الكلام = ماصغت شعري ولا اتعبت اليدين
العقد بالفين ياكثر الكرام = في ساعة البسط صارو جيدين
وهنيا لو تطلبه جاله سقام = يحلف لك انه مطفرن مايعين
من يستحل المحرم به فصام = ياويلنا من تمادي الجاهلين
ليله ورتم الطرب كله غرام = ضيعت راتبك فيها للّعين
رجعت للبيت وبراسك زكام = وطبال بقعاء لها باذنك رنين
فكرت والا ان هذا شي حرام = ياكيف حسبانها يالطيبين
الجسر يشهد وكاسات المدام = دام اننا ماتبعنا الراشدين
حرام تخرج من اديار السلام = الا ضروره وفيها شاهدين
هذي نصيحه وللكل احترام = مانقد ولا الوم احد يالخيرين
يالله رحمتك من قبل انتقام = يارب تهدي قلوب التايهين
والختم صلوا على سيد الانام = محمد المصطفى باهي الجبين

اخوكم ومحبكم

فلاح