[عمر ال شيبي]

المشاركة الأصلية كتبت بواسطة الطائر المهاجر

ليتني ما دخلت السوق بعد العشيّه = مير الامر المقدر مايفيده نذير
احسبني شويّب ما بقى به بقيّه = واثر قلبي ولو شيّبت باقي صغير
وكنت اظن الهوى والعشق بين البريّه= ينتهي لاانتهوا والشيب اصبح كثير
لين ما شفت ريمٍ لو عليها عبيّه= ولو تغطى اعرف الزين ماني ضرير
غصن ورد يتثنى ما يبي مزهريّه= يكفي الريح تنعش من وقع كالأسير
ناظرتني برمشٍ فيه سهم المنيّه = ثم قفّت وانا اللي واقفٍ كالغرير
ضيّع امه ويركض يمً هذي وذيّه = ثم يرجع وياقف جاهلٍ بالمصير
لين ماجات وحده ناظرت به شويّه= وهمست في اذانه كلمتينٍ لا غير
كان حسيت ناري منك حالي رديّه= قلبي اللي حرقته مالقى له مجير
قلت وش لك بهرشٍ ما بغته المطيّه= وانتي المهرة اللي تستحق الأمير
قالت الحب ماله عمر وإلا هويّه= انت غاية مرادي بين خلق كثير
بين عقلي وقلبي حرب حول القضيّه= ضاع فكري ونا اللي بالعذارى خبير
قلت يابنت شوفي ماورايه رجيّه= موتري دتسنٍ والحال حال الفقير
قالت ابغى الرجوله في زمان الدنيّه= ما ني اللي يدوّر عن فراشٍ وثير
قلت شغلك وقالت كل شيٍ عليّه= في المشافي طبيبه انقذ المستجير
شمعةٍ تحترق لو كان حالي مليّه = ضاع عمري واشوفه متجه للحدير
كنت اظن الشغل في الطب اثمن هديّه= ماحسبت لضياعي بعد عمر قصير
وغيري اللي سعيدٍ بين طفل وصبيّه= لا ضعف يوم يلقى من عياله نصير
قلت غلطة هلك مافكروا بالخطيّه= فالمره دون رجل ماتساوي نقير
المره دون رجلٍ لوهي انقى نقيّه= يطمع الكلب فيها لو جِرَيٍّ صغير
كلما انتي تبينه حايطٍ فيه فيّه = تستظلي بظله وان بغيتي بعير
ودام هذي حوالك مالقيتي البغيّه= دوري غير عودٍ في زمانه خبير

هلا بقلب الخضر
صح لسانك
انت جيت سوق مركز السلطان حقتنا وما تْمُرني

الله عليك

ما اجمل فكرك وروحك