[نايف يوسف الصنيدح]

السلام عليكم ورحمة الله وبركاته

احبتي كل عام وانتم بخير وصحه وسلامه

الحمد لله اللذي بلغنا رمضان وأسأله أن يرزقنا صيامه وقيامه


أحب أعتذر منكم عن غيابي لظروفي الصحيه

أسأل الله انه يرزقنا الصحه والعافيه وأن يشفي مرضانا ومرضى المسلمين


متواضعه أتمنى تقبلونها كما هي..:

محدٍ يحب بخاطره كيـف مـاراد=ولاحدٍ تحب الناس قلبـه غصيبـه
ومحدٍ تخيّر فالهوى قـرب وبعـاد=ولاحدٍ له الا ماقسم لـه نصيبـه
أحدٍ مع نفسه صراعات وجهـاد=وأحدٍ تطيب النفس من زود طيبـه
ياناشدي عنهم ولانيـب نشّـاد=خـل المقفّـي ياولـد وش تبيبـه
من عرّض كتوفه لعينـك ولاعـاد=عرّض له الضحكه وشـب بمغيبـه
لاتكشف اوضاعك ولاتطلب اسناد=ترى الجروح اهمالها هـو طبيبـه
وخاو الرفيق اللي مخاواته ضمـاد=تطفـي مواقيـد الزمـان ولهيبـه
واما ردي الشور ما يقـدح زنـاد=والمرجله دونـه ولا هـي قريبـه
وان ماحصل خوة هذولاك الأجواد=في عزلتك عـزٍّ لذاتـك وهيبـه
كم واحدٍ قبلك عشق لين مابـاد=لا ذاق من صافي ولامـن سريبـه
خذها وانا خيّك ولا تخطي عنـاد=قد قالتـه قبلـي عقـولٍ لبيبـه
محدٍ يحب بخاطره كيـف مـاراد=ولاحدٍ تحب الناس قلبـه غصيبـه