[الطائر المهاجر]

ودعتهم في امان الله راحوا بعيد = في حفظ ربي يروحوا ويرجعوا بالسلامه
ادري بقلبي قويٍ في المواقف شديد = لكن مع فراقهم حسّيت اقوى انهزامه
نارٍ بجوفي ونارٍ في ضلوعي وقيد = اخاف غدر الليالي بعد طول ابتسامه
راحوا يبون المعالي لو بدربٍ عنيد= في دار غربه وليل الحزن خيّم عتامه
ياكود يلقوا وظيفه بعد جهدٍ جهيد = مثل الذي جوا وفود والكل تربح سهامه
في ديرة اللي بها اصلي بليا عضيد = يعيش مثل الغريب اللي تنكّد مقامه
في ديرةٍ ما تبي ياكود مثل العبيد = اللي تنفذ اوامر دون فكر وفهامه
لو كان بالود ودي ما يروحوا بعيد= واعيش معهم بقايا العمر دام بختامه
ماني غنيٍ اشغّل مالي اللي تليد = واوجد لهم فرصةٍ والكل يلقى مرامه
مستور حالي وعايش في حياتي سعيد= إلا من فراقهم فالقلب يشكي سقامه
يالله دخيلك فلا بي جاه ولاّ رصيد = ابيك تحفظ حواقيلٍ عليهم غمامه
وافرح بهم ف الوظايف بعد عمر مديد= كلٍ تكفّل بنفسه وارجهنت عظامه