لا والله الا خاب ظني وحدسي = مع الهقاوي بالرفيق الموالي
جيته واناوضعي بخيرٍٍماهوسي= احسبه مثل اطويق يومه زمالي
عزاه كانه يحسب الواجد اشوي= والرزق عنداللي ينشَي الخيالي
المال قد قالوه يقفي مع الفي = وتبقى المراجل مع زحول الرجالي
وقد قالو العربان قبلي ومبـطـي = لغير اهلها ماتجي راس مالي
وقال المثل ماغطت النثلة المي = يظهر ويسقون العرب والحلالي
اثره مبجل يوم عاد الفحل حي = ومن حشمته يحشم من اول وتالي
منين ياتيه الردى والعرِِق ري = مابين خال وعم شمخ الجبالي
والوالد اللي يشبه لحاتم الطي = وجدوده اللي ذكرهم بالعوالي
قلته وانا ماني مشره على خي = دامه نشا في بردها والظلالي
ماجاه لامسرى ولا الوجه مشوي= من حر لاهوبٍ يجيه وملالي
يطرد ورى رزقٍ يجيله ويقفي = حالة شقى تصقله صقل السلالي
ومقارعة بيضان الوجيه والسي = ياخذ ويعطي بالليالي الخوالي
نوبٍ مع البدوان مامور منهي = يتبع نهجهم في رُقي المعالي
ونوبٍ مع الحضران ماهوب معفي= يبيع يشري بالذهب والريالي
يدرى اهروج مشوَهٍ عارفٍ عَي = شذَاب عرقوبٍ بسود الليالي
قلته وانا مارضى على مثله بلي = وارُد عنده لابحث له مجالي
مالي غناةٍ منه مهما حصل لي = ولاله غنى مني بكل الحوالي
وختمٍ الوم النفس مما حصل بي= وادرى اهروجٍ بالقفا بي تقالي