لا صرت عاطل او تبي لك وظيفه = تعطيك راتب مثل باق الخواجات
ان كان ماانت ابيض تراها كليفه= قشر لوجهك لو دفعت الألوفات
حتى يصير ابيض ولو كان شيفه= واذهب على لبنان تاخذ لدورات
تاخذ دروسٍ ف الغنج لو خفيفه = وتضبط اصول النصب لاصعب مهمات
كلش تعرفه ف الأمور السخيفه= وكلش حلالٍ في دروب الملذات
وتغير اسمك للاسامي اللطيفه = جوزف وبطرس بعد ما تشري اثبات
وتشري شهاده من اميركا نظيفه= خبير ناجح في جميع المجالات
وخلك جزوم ولا تجي لك وجيفه= انحر كبار القوم وابن العلاقات
هذا يبي سهره فتعطيه كيفه= وهذا يبي يقلع وينصى المجرات
وهذاك دلخٍ لو تشوفه بسيفه = ياسرع طرحه من جميل البنيات
جمد ضميرك ف الظروف العنيفه= دامك ضبطت الدور تلقى المسرات
ومن بعدها تبني القصور المنيفه= وتصير واحد من كبار الزعامات
في امةٍ لو فتحت كالكفيفه= او نخلةٍ عوجا تحتها مجاعات
ولا صرت فاشل في الدروس الضعيفه= وتبغى مناصب صانعه للقرارات
تدير من تبغى ومن جاء حليفه= تحتك عقول كبار باكبر شهادات
ذلل لنفسك للخوي اووصيفه = وخلك سلوقي في بلاد الوساطات
اكذب ونافق في العلن بالصحيفه= وامدح بشعرك من جزيلات الابيات
حتى تصل للي تبي او عريفه= من اللي يبي تطبيل في كل حزات
وليّا تفوّت كل يومٍ مضيفه = قرّب لحوله تختصر للمسافات
حاول تفهّم وش يبي من غريفه = ومن قبل يامر اسبقه بالمهمات
حتى يثق بك لين تصبح وليفه= يبيك جنبه دوم في كل الاوقات
من بعدها تصبح سهامه وسيفه= وتفتح لك الأبواب لو هي صعيبات
هذا هو الواقع بحالٍ مخيفه= الذيل يعلى الراس بارض الحضاوات