[الطائر المهاجر]

عطني ضميرٍ حي واعطيك انسان= في غابةٍ ترفع شعار الحضاره
مهما تخادع انكشف زيف الالوان= صهيون تحكمها بخبث وحقاره
لاتقول اوباما يخالف نتنيان = دميه تحرك مثل باقي الحجاره
الحكم للدولار في كل ميدان= والشاطر اللي يستغل التجاره
وصهيون سخر مكسبه وين ماكان=حتى تحكم في شئون الإداره
يدير اوباما وغيره بإتقان = ويستخدم الإعلام يخدم شعاره
ماقال قالوا صدق مافيه بهتان= ومهما فعل قالوا السبب من جواره
وحنا رغم ثرواتنا مالنا شان= كلٍ بنفسه لو يبيع لدياره
ما كننا احفاد من ساد الاكوان= من كل مسلم في ضميره طهاره
ماهمته دنياه لو كان جوعان= يبي رضا الرحمن في كل غاره
واليوم صرنا بين غافي وعميان= ما يعرف انه ماشيٍ بانحداره
يحسبه في مأمن ولو شاف دخان= ما يدري ان النار بأول شراره
صهيون خطط كل شيٍ بحسبان= وحنا الهدف ياجاهلين الإشاره
حقده على الإسلام مافيه قولان= وحقده على العربان يرسم مساره
اليوم في غزه وبكره بتطوان= وبعده اراضي النفط غاية قراره
ان ما نفضنا غبار ذلٍ وخذلان= مصيرنا ليلٍ توارى نهاره