كيبورديه عجله
الضعف شين وكل مقرود مطلوب= حتى ولو هو ريّسٍ في بِلاده
هذا سبيل الغرب مع كل مغلوب= ومع من عصاهم ما خضع في بَلاده
في محكمه رزّوا بها كم مندوب= وباسم العداله كل يشفي مراده
إلا على اسرائيل فالوضع مقلوب= ماحدٍ يدين اللي تمادى بفساده
مهما فعل مسموح مالحقه ذنوب= يهدونه اللي زايدٍ عن عتاده
وحنا بنظرهم بين جاهل ومجذوب= مانستحق العيش مثل الجراده
اشباه اوادم حاكمينٍ او شعوب= خشاش ارض ويستحق الإباده
ولا من تأملنا بلا فكر محجوب= باسبابنا ماصابنا من قراده
فلم الشمل ماهوب بالحيل مرغوب= وكلٍ امير ولو يعيش بوحاده
يستضعفه من آزر اولاد يعقوب= ممن يديرونه بعقل وركاده
اموالهم تحكم رئيسٍ ومهيوب= واموالنا تصرف على غير فاده
وحنا انشغلنا بين ناصب ومنصوب= وهم في مجال العلم اهل الرياده
وحنا غدينا بين ناهب ومنهوب= وهم يعزلوا الناهب و لو هو قياده
ومادام هذا الحال والوضع مقلوب= فكل على زرعه يلاقي حصاده