[الطائر المهاجر]

اشره على الطيّب اذا اخطا عليّه = والاّ الردي ما يستحق المشاريه
واجنّبه من شان يدري الخطيّه = حتى ولو عانيت لا جيب طاريه
ادري بأنّه ما يدوس الرديّه = لكن يغره وقت ينسى مواريه
وقتٍ يخلي الأخ ينسى اخيّه = ويطرد ورا التيّار عله يجاريه
يلبس لثوبٍ كود يرضي البريه = ولا هوب من ثوبه ولو كان شاريه
يعيش في وهمٍ يجر الأسيه = ويبعد عن الواقع وظنه يباريه
ولو حكم لعقله بفكر ورويه = يعرف مقاسه قبل يكشف لعاريه
ومن قلد لغيره فلا له هويه = يضيع في دربه ولا من يداريه
العقل نعمه فلا تكون الضحيه = تعطي العقل للغير ماكنت داريه